PENSAMENTOS : AMOR OU PAIXOM

Djam pasa idadi di tem tipo fisiko di um homi idial pa relasina.

Antis ngostaba di um Berdiano bem alto,odju ki ta domina i perdi kabeça pa el, si el ta jugaba basquet dja era perfeito.

Hoji nta konfesa ma txeu kuza muda,um relasom no ta konstrui dia traz dia,ko paxenxa i txeu konvensa

É interesante,horas ki no dexa di akredita na amor di nos vida, é la ki el ta parse,sem kel storia di alma gemea,sem promesas di amor eterno,sem borboleta na bariga,sem noti em branko

É tipo...Bo ta konxi um alguem bo ta admiral i perdi na el,bo ta fika ta manda mensagens indiretos,ta dizenha kuraçom ko spetativas até dimas.

Mas ko amor bo ta skesi tudo kel ke ka real,adeus sonhu di adolisenti,ko um bejo el ta sabi ma bo kasta mutu kontenti,ko um "OI" el ta sabi ma bo sta ko TPM, el ta perduau ko karinho qualquer palavra fora di tom.

Ndiskubri ma o kim gosta di verdadi é di amor,di paixom nau.

Di tanto tempo ta skrevi sobre um alguem ki ta tram txom,ki ta tram ar,...mas nta bem ko tudo humildadi ta retifika.

Nkre um alguem ki ta dividi txom ko mi,nkre um alguem ki ta dam folgu.

Nkre durmi braçadu sem asusta, ki pasa o ki pasa nada kata muda.

Antis nta atxaba ma si katinha paixom man ta paraba di skrevi,ma nha inspirasom ta kabába...mas ndiskubri mé ka nada di kela,ama é kruza sukuru sem xinti medu.

Antis era paixom,imaduridadi,talvez buskam na undi kim kasta enkontraba

Nsabi ma djam fala txeu sobre amor, é um grandi tema sobre nos vida

Amor é ka so poesia i refrom

Amor é rekonstruçom é ritmo,pausa i txeu dizafiu

Ama é sima horas ki bo sta prendi toka guitarra,bo ta dizafina mas bo ta insisti até bo fazi um grande melodia

Nkre um amor tranquilo,nhos podi até fla "que tedio" mas é verdadi

Paixom é pa frakus

Amor é pa sempri