CD Joias de Africa vl.1 Triyana

FOI SÓ 1 DIA (ELVIS)

POEMA : TIGRE

É bó tigre!!!!
Bu ta spiam dentu de fodjada
Ta matuta tempo pa spera midjor xansi pa ataka
Ku bu korpu numpriti bu ta gatinha na txom

I di um salto bu ta agaram
Devoram ku bus dentis
Satadja nha korpu padás pa padás
Sangui,denti,osu i karni
Kaba ku nha alentu,dexam sem mexi na txom

Da kosta bu bai
Ku bu andar i bu ombru dominanti
Kel odju ki ta trapadjam
Fika anus e anus na bu selva ta kontempla nha restu ki dja bira nada
Sem alma sem ser
Nha osu branku dja fika e bó sem dor nem margura

Óh nha amor assassino, di lonji nxintiu
Kêtu na nha lugar nfika,ta spera pa bu devoram!


By: Triyana

POEMA : NHA KODÉ ( DÉNIS XAVIER )

 Dia ki bo nasi,

 ko bo alegria bo ta bem poi kor na nha boka pam pode ri

 Nha peto quenti ta spera pa bo

 Kel dia ki bo ta nasi

 ko bo kalma bo ta bem kaba ko tristeza de xinti nha mó vaziu

 Ko tanto amor kim tem pa da,e nka sabia ma era tudo pa bó

 Nha kodé, ko bos primero paso bo ta bem kura nha dor de xinti só

 Dia ki bo ta nasi bo ta dexa nhas lagrimas mas dosi

 Mama kateni mas medo

 Nha kodé dja bo trazem nha alma ki staba fitxado dento dum kristal

 Kurasom de mama sta palpita pa odja bo karinha pa primero vez

 Nha anjinho,nha tigrinho,nha kodé…

 Mama sta sperau pa bo kompletal.

By triyana