POEMA : UNIVERSU TA KONSPIRA

Mpodi konta strelas
Mpodi konta areias
Mas inda nkata podi diskrevi

Ondas di Mar xinti intimidadu
Meia Lua ta spreta
I abo nha frenti

Indifinison nem sempri é mau
El é bastanti stimulanti
Keli ta permiti kontinua ta saborea ate difinisom

Ami nta inventa tempu
I abo ta spera pa momentu sertu
Será ki distinu sta na meiu?

Insertezas ,inseguransas...
Dexa kela pa manhan
Pamodi nos peli sta fala mas altu

Impulsu i prudensia
Mas universu konspira
I 2 polu kaba pa atrai na bu costa

By: Tryana

POEMA: DIZISTI DI INSISTI

Insisti
Paké insisti?
Un diskulpa traz di otu
Bu kre tudu i bu kata fazi nada

Vontadi podi dau...
Mas undeu?
Keli é horas ki bu odja ma ka bali insisti mas

Txom ta torna abri
Mas di um ladu, mas um bes nsta bem pou
Nha kurason podi torna bem ratxa
Mas bu ta volta ser apenas kel ki podia ser

Djan dizisti di tantu insisti
Na kantu di odju ta fika kel ultimu lagrima
Nha fiansa ta bem saim karu
Mas nkasta insisti nes prizon sem un razom

...Hoji ndizisti di insisti...

BY: TRIYANA

POEMA . INTENSU I KALIDU

Hoji mas un bez nhas azas sata bem vua
Kontinua ku bu odju na mi
Bem dilira kumi

É kel intensidadi
É kel kalidez
Nsata visua na bu txeru

Nha kurason é un atleta i nha kabesa ta dam voz di prizon
Katen advogadu pa difenden
Juiz sta na zmira pa julgan

É ka pekadu...é un direitu divinu
Nu ganhal ku tempu perdedu
Ku kada lagrima vingadu

Aman ku kabesa i dizejan ku kurason
Kontinua intensu i kalidu na kada toki
Ki ami nta volta ser dibo

BY: TRIYANA

POEMA : SÓ PA HOJI

Só pa hoji
Nka kré skrevi
Nkré fazi nhas poemas

Só pa hoji
Nkre tral di papel i xintil
Bu dedu nha tekladu
I bu rostu nha ekram

Só pa hoji
Nta ben trau di fantazia
Só pan fazeu rialidadi

Só pa hoji
Nsta ben splora kada milimitru di bu peli
I si for pekadu podi krusifikam

By: Tryana

POEMA: N´SUNHA

Nsunha ku kuzas
Kuzas kin ka podi sunha

Ku perna ta tremi
Kurason ta palpita

Folgu fadigadu n´korda
Sensia na bo

Mpanha papel ku kaneta nskrevi
Nskrevi kel kin ka podi sunha

Ntenta tral di pensamentu i pol na papel
Mesmu na papel dja el era pekadu

Nsunha 3º pekadu kapital
Nsunha kubo.

BY: TRIYANA

PENSAMENTU : UN KARTA PA ITERNIDADI

Kretxeu...

Alenu li, nes noti infinitu, ku txuba ta kai na rua, sima kel sta txora di emoson di odja nos amor.
Verdadi é ki kada segundu, minintu, hora, dia i mes ki nu pasa djuntu el ta kaba pa ser un lasu ki ta maranu na kumpanheru pa iternidadi.

Kada instanti ki pasa nu konxi mas, gostus, alegria, tristeza i defeitus, di kela ta fazi nos relason moda un BAMBU, ta torsi, ta stika, ta dobra, na meiu di tempestadi mas el kata kebra, pamodi el é forti.

Bu kata fazi parti só di nha ser mas sin di nha konsiensia. Bó é kel fiu ki liga nha vida dizordenadu. Es ser ki era apenas ossu i karni, un makina sen enerjia volta ten alma, volta da sentidu na nha vida.

Julgadu pa uns i aplaudidu pa otus, mas na final poku ta importa, pamodi na kel sirkulu so bo ki sta.
Nka debi ser orgulhoza, mas sin agradesi pamodi bu volta dan folgu igual ki mi é bu bengala.

Nta termina es karta ku apenas, nsta sperau mas logu pa nu torna obi txuba ta txora di emoson di odja nos amor.

P.S   I LOVE YOU

PENSAMENTUS : KAUS I BORBOLETAS

Nten ki konfesa, ami é kontra equason, formulas i resposta sertu.

Nka gosta di kuzas difinidu.

Sertezas kata kalan, Talves pamodi mi nta sta iternamenti ta kestiona i interoga u ki kata splika.

Nten ki aseita ma sempri atrain konseitu di KAUS. Ka nhos interpretan mal por favor.

Palavra pa el mesmu dja ta trazen un simpatia: “KAUS” era uzadu pa Gregus ku sinonimu di FENDA ou SPASU INFINITU. Kel simplis ideia dja nsta gosta, i ka é so kela.

Teoria ta konfirma instabilidadi natural di mundu ( i di nos mesmu ) : Ten orden na dizorden. Nhos odja?

Pa mi, nada ka podi ser tan rial i inspirador. Ta parsi loukura neh? Odja nton, vida ta dizenrola la fora ou nton atrevi i vira pa bo mesmu. Previzon ta fadja, rezultadus ta surprendenu, kontradison ta kontisi ( i ami nta agradesi pamodi mundu ka é linial )

Nle un bes ma simplis bater di aza di un borboleta podi provoka un TUFON na otu ladu di planeta. Nhos sta odja un kuza?

Ah, mas nka sabi nau, nkata ntendi nada di Fisika, nen di skalas di temporal.

Nha storia é otu.

Nta akredita ma un disizon pikinoti na vida podi muda txeu kuzas mas pa frenti. Dimenson di tal disizon? Nka sabi midi, mas pa duvida nta konfirma :

-Nta kalma Borboleta ki ta bua na nha bariga i inta IZIJIL pel konsentra.

Afinal, nunka nu ka sabi temporal ki un sonhu é kapaz di kria

AREPIU

Ku apenas un olhar,
Un toki i bu voz pa fazen arepia

Nha peli, bu txeru
Era beijus ki ta fazeba dizejus di karni

É un arepiu di odju fitxadu ki ta kumesa na pé i ta paraliza kurason
Ta termina na un abrasu pertadu

Beijus kenti,
Korpu suadu
Folgu fadigadu

Mas direpenti, di un suspiru tudu fria, tudu termina
Nkonjelal na nha kurason ti kel dia ki bu volta
Kel dia ki bu ta fazen direti i arepia dinovu na bus brasus.

BY : TRIYANA

POEMA : FLAM

Bu sta na sombra di nha olhar
Nta tenta guardau e é midjor assin

Bu sta na sombra di nha olhar
Nta tenta atxa nada mas alen di bo

Flan kel ki djan sabi
Nteni txeu pan kontau dimi

Nsabi ma é mi ki ta domina bu ser
Nsabi ma é mi ki ta fazeu filiz

Falan dibo, nkre obiu
Di lugar undi kin sta, mpodi odja kaminhu ki ta lebam pa bo

Tudu ten kumesu i fim, mas dinos ten infinitu
Nsabi ma nu é imperfeitamenti perfeitu

BY: TRYANA

PENSAMENTO : LISON DI VIDA

Nos ason, kondutas i komportamentus ten ses konsequensias na roda di vida "pamodi vida e un roda".
" KADA UN TEN KEL KE MERESI ", keli nu podi ntendel ku bazi a kes konsequensia di nos atus. Nu podi akredita na es frazi konxedu i popular, horas ke meresedu el e pozitivu. Mas pergunta pa parsi horas kin  fla " nu meresi " i kel ki vida ta danu i sirkunstansia adversu ki ta leba sufrimentu, mudansas i ate disgrasa.

Nton nu ta pergunta, tudu kel ki sta pasa ku nos sta obdesi a konsequensia di nos atus?....Nta atrevi na fla ki " KADA UN TEN KEL KE MESTI ". Ten momentus, nu mesti odja diretamenti na konsequensia di nos atus " ku mal intenson ". Na txeu otus momentus, tudu kel ki ta kontisi ku nos ten un motivu di aprendizajen, " NU MESTI PRENDI " i kela podi ser kel splikason di tudu kes otus kuzas ki ta kontisi na nos vida, ki nu kata relasiona ku un komportamentu previu " inkoretu, inadequadu o ku mau intenson ". Portantu, " KADA UN TEN KEL KE MESTI PRENDI ". 

Dibaxu di kel premisa ta ben kel pergunta ki nos tudu ten ki fazi na tudu momentu en ki vida ta surprendenu na sirkunstansia adversu : KUZE KIN NTEN/MPODI PRENDI KU TUDU KELI?

Di kel forma li, nu ta odja VIDA SIMA UN SKOLA, xeiu di lison, na kada pasu un difikuldadi, un ezami, un sirkunstansia ki ta ponu a prova. Akredita ma nos intenson e supera kel lison pa nu sigui pa frenti, pa nu prendi i sta preparadu pa kes prosimus lison ki di serteza sta pa ben ( na kazu di ka ben, nha amigu akredita ma nu sta 1m baxu terra ).

Nta akresenta ki, " nu sta preparadu pa kel ki sta pa ben, nu ta ten kapasidadi i stratejias pa superal i kria djuntu kol, apenas nu ten ki prendi " a keli nu ta txomal di " Resiliencia - volta a stadu normal" .
Nsabi ma keli ta parsi un bokadu duru i difisil, mas sima nu ta prendi ki nu ta supera, sima nu ta ben disfruta i xinti satisfeitu di nos mesmu i di nos vida.

LISON DI VIDA, E UN VIDA NTENDEDU SIMA UN SKOLA, undi ki nu podi prendi, supera lison, nxina pa otus, subi na nivel di konsiensia. A tudu keli adaptadu a nos momentu vital, sempri ku objetivu di atxa sentidu a nos vida, armonia na nos forma di vivi.
Ami nka ninguen pan da lison di vida, mas nsabi ma KARMA ta izisti i ma nunka nu ka debi di poi kulpa na alguen si algu na nos vida sta bai mariadu, antis nu devia di djobi pa nos mesmu i diskubri undi ki erru sta.

BY : TRIYANA