PENSAMENTU : MAS JENTILEZA

Mas jentileza por favor.
Onti noti di madrugada, sen konsigui durmi pa algun ki otu razon, nfika ta pensa... nhos rapara ma na es tempus modernu dja nu dexa jentileja di ladu, i nu ta diskulpa nos falta di edukason, ta poi kulpa na stres, podi ser un resposta trabesadu pamodi e Natal i tranzitu sta insuportavel, falta di dinheru, falta di saudi, falta di tempu, falta di grasa na vida, mutivus e txeu i es kata para, mas sera ki en nomi di nos falta nu ten direitu di ser menus humanus?
Undi ki sta kel delikadeza, edukason i respeitu? Undi ki bai para o ki nu e? Nhos diskulpan mas e difisil di respondi.

Nu sta tan individualista ki mal nu ta persebi kel otu, undi ki bai para u ki nu e? Nhos diskulpan, mas e difisil di rispondi, ami psualmenti nta atxa me falta di intelijensia privilejia apenas o saber i ka valoriza  ken ten un vizon jenerozu di mundu.
Pa mi, kombinason di kes dos, konhesimentu i sensiblidadi e un pratu xeiu pa nu vivi midjor. Pa nu kria, tantu psual komu profisionalmenti, mas infelismenti e ka kela ki nu ta odja, respeitu ta parsi ma dja sai di moda, jentileza nton bira jirias di nos avos, nada di bon dia, boa tardi, un olhar pa bu persebi komu humanu, importanti e sklaresi.

Nka gosta di jeneraliza, nkonxi alguen ki na meiu di " salve se quem puder " ta kontinua ta ser alguen, el ta inxerga na ses odjus kel otu, es ta oferesi sen ninhun konstranjimentu un abrasu, un ajuda inesperadu, un silensiu na hora sertu, keli pami e ka disparatis ou ser dramatika, e apenas kel bedju i bon edukason ta pidi pasajen, ta implora pel ka skesedu dentu di karru na horas di problema, e klaru ki nu ka mesti ki fla obrigadu a kada instanti, mas antis un palavra dosi ki dexa kel nos ladu di brutus. akredita ma tudu alguen ten el.

Nsabi ma podi ser injenuidadi di nha parti, mas inda nten fe na ser humanu i na mi, parsen ma alguen ki dizenvolvi se sensibilidadi pa persebi kel otu, seja na trabadju na kaza ou na rua apenas el ta ten e a ganha, un promoson, un trabadju midjor, un namoradu midjor ou ate un amigu di verdadi, un dia mas feliz ou apenas un surizu, ki a nha intender dja bali sforsu por issu mben alerta a ken sabi obi, mundu mesti mas jentileza i menus kara maradu

Madre Teresa de Calcuta fla " Palavras gentis podem ser curtas e faceis de falar, mas os seus ecos sao efetivamente infinitos "

BOAS FESTAS

TRIYANA

POEMA : FULA DI AMOR

Bu ta sabi horas kin ta amau i adorau
Mas bu ta intui horas kin sta fula
Pamodi di kel dos manera la ki vida é 
Vida é aza di silensiu i lumi ten si metadi friu

Pan kumesa ta amau nta adorau
So pa kumesa infinitu i pa ka dexa di amau 
Nta amau sima kin ten xavi di filisidadi na nha mon
Akredita ma ka é un distinu insertu 

Nha amor ten tres vida pa amau
Por issu kin kreu mesmu kin sta fula
Bu ta tokan pan dexa di ten korpu i dibo ta nasi
Si bu beben nta konverti na bu sedi

Dexan respirau pan sufoka na alentu
Nha peli ta bistiu pa bu xinti mas kalor
Bu sodadi ta ser nha spera
I ami li fula di amor

BY : TRIYANA

POEMA : AMOR PERFEITU

Nkata spera pa bu ser perfeitu Pamodi nta respetau sima bu e Nkata pretendi pa nunka bu fadjan Pamodi bu e sima mi, un ser humanu Nka kre sabi tudu bus segredus Nsabi ma bu e un alguen aparti Nen pa bu kubri tudu nhas nesesidadis Pamodi nta ntendi ma bu ten dizejus i sonhus proprius Nkata poi en duvida bu forsa Pamodi nsabi lonji ki bu txiga Ma tambe nkata spera pa bu leba tudu pezu Pamodi nsta li pa djudau lebal Nkata pidiu pa bu sabi tudu resposta Pamodi nsabi ma ta ten bes ki bu ta ten duvidas igual ki mi Apenas nta pidiu pa bu kontan sima un amiga horas ki bu mesti apoiu i alegria Sima sosia na bus sonhus i futuru Sima konsolu horas ki bu mesti skesi mundu I nta pidiu pa bu kunfia na mi i respetan sima mi nta fazi sempri Ka bu skesi ma e bu PETU ki e nha konsolu i ki tantu nta ama desdi kin ta lembra di mi

BY : TRIYANA

PENSAMENTU : TXERU, ROPA I MUZIKA

Ten kuzas ki ta fika sempri gravadu na nos mesmu, muzika, txeru i ropa.
Katen otu manera, bu ta xinti kel TXERU i bu ta lembra na instanti kel abrasu, ki na nha kazu ( etah feromona ki ta diskontrolan amor, nta sai di mi...GRESSIVUS PAH ). Bu ta obi kel MUZIKA i bu ta volta mentalmenti na kel dia, na kel lugar ( na nha kazu Alkimist, i el ta kantan HELLO na nha obidu ). Bu ta abri armariu i bu ta kontra ku kel ROPA ( bistidu ) ki a 6 mes atras bu tinha bistidu, el ta dau buleia pa kaza, bu korpu ta treni di nervoza i derepenti el ta trapadjau kabesa ku kel beiju infinitu.

YAH, memoria ta preganu partida, el ta fazenu lembra u ki nunka nu ta kre skesi i tambe u ki nu ta finji ma nunka kontisi.
Por issu nta fazi ku nhas sentimentus u mesmu kin ta fazi horas kin ta ruma guarda fatu, nta difini sempri 3 kaixa : FULIA, TALVES I GUARDA.
- Pa kes ki katen presu i ki apenas ta fazenu bem, regra e uniku i simplis, nu ta GUARDAL, di preferensia ku tudu karinhu, ten kuzas ki bali pena, mesmu ki na odju di otus alguen el sta fora di moda.
- Pa kes ki nu ten duvida, sepa pamodi el staba na rebaixa i nu aji pa impulsu nu ta pol na TALVES. Nu ta stipula un prazu pa disidi, na kazu di TALVES kria ate dimas lembra ma " kolesiona inserteza apenas ta fazenu mal " nton analiza i poi orden na guarda fatu.
- Pa kes ki kata sirbi mas, ki kata kombina ku u ki nu e, simplismenti el kata fazenu dretu, dikas e u siguinti ( dispega sen remorsu ), dexa spasu pa kel ke novu entra, sen lamentus sen sodadi, sen medu di vaziu.

Pa mi kata izisti ezersisiu mas podirozu di ki "dexa bai", e difisil da gaita, mas el ta fazeu un bem inkrivel, pamodi el ta fazenu odja pa dentu, ta fazenu nkara kel ki nu e, prinsipalmenti el ta fazenu nxerga ma mudansa e uniku forma di nu kria, portantu, horas ki bu ta ruma tudu kes gavetinhas  ( di dentu pa fora ) poi na kabesa " GUARDA U KI E RARU, ANALIZA U KI KASTA KLARU, REKUPERA KEL KI E KARU I DA A DEUS KEL KI PARA DI RIMA "

BY : TRIYANA

PENSAMENTOS : DINHERU ( sen voltas txeu )

Txeu alguen ta kondena ambison di ten dinheru, até es ta txiga di odia emprezarios i es ta katalogadu di alguen ambisiozu pa natureza.Tambe ta izisti txeu kritikas sobre alguen ki ten ambiso  na ten txeu dinheru.

Nta pensa ma nos tudu pode fala txeu sobre dinheru, nos tudu sabi me BOM tenel i é MAU ka tenel, pamodi ki é BOM dizejal i é MAU ka dizejal?

Sertu é ki tudu alguen ten un pontu de vista diferenti sobri dinheru, mas poku alguen ten klaridadi i é por isso ki kada alguen ta bai traz di kuzas diferenti.
- Txeu alguen ta pensa ki dinheru é raiz di tudu mal.
- Ten txeu alguen ki ten problema ku dinheru i es podi fazi tudu esporsu di mundu ki nada kata muda.
- Tambe ten kes ki e txeu ambisiozu ki ta buska sigui konseitu sternu di riqueza ( trabadja, studa, ten un negosiu, trabadju extra, ten 2 trabadju, larga trabadju pamodi el kasta dadu kel aumenti kel kre ou meresi, etc. ) poi se saudi en risku pa dinheru.
- Ten kes ki konsigui ganha txeu dinheru mas es ten medu ki otus alguen rejeitas, invejas, nton es ta kria un proteson a ses volta pes fika forti i duru, dila ta ben nasi kes rikus DESPOTAS, AMARGU i AMBISOZU.

Desdi pontu di vista di lei di atrason, bu ten ki pidi a universu u ki bu ta dizeja, i komu universu sta programadu pa respondi a tudu dizejus, imidiatamenti el ta dau u ki bu pidi.

Si nu fala di prosperidadi i dinheru nu podi da konta di ki ninguen sta klaru, alguen katen serteza di se dizeju di prosperidadi por isso nu ta xatia horas ki alguen ta fala del, ou nta foka na el ou ta kobra di ses servisus.

Ten un lista grandi di kontradison:

# Lista 1- dizeju na ten dinheru:
- Ser livri
- Troka di kaza
- Ten liberdadi total i absolutu na kumpra i paga tudu, absolutamenti tudu ki bu mesti ou dizeja

# Lista 2 - Medu na ten dinheru:
- Pontadu dedu, sta kontra bo i  kritikau
- Kasta feliz pamodi dinheru kata kumpra felisidadi

# Lista 3 - Dizeju na kateni dinheru :
- Medu di ser furtadu, asaltadu i sequestradu
- Atrai inveja ou ki alguen ki ta importau dexa di amau pa kel ki bu e i kreu pa bu dinheru
- Medu di muda di zona undi ki ta vivi txeu alguen " NICE " ki ka kre ser bus amigus

# Lista 4 - Medu di kateni dinheru :
- Kateni pa kume
- Vivi na rua i kontra ku prigu
- Disprezu di alguen pamodi bu e pobri i suju ou ki ta vivi na rua

Si nhos rapara na kel lista li nhos ta odja kontradison ki sta programadu nos menti subkonsienti.

A ) Nu ten medu pes kritikanu pa nu ten dinheru mas tambe es ta rejeitanu si nu fosi txeu pobri.

B ) Nu kre ten dinheru pa kumpra midjor kaza mas nu ten medu di vivi na un zona novu undi ki nu podi ka enkaixa ku vizinhus.

C ) Nu mesti dinheru pa subsisti i pa qualquer atividadi pikinoti o grandi, insignifikanti o importanti mas au mesmu tempu nu ta pensa mes podi furtanu, asaltanu ou sequastranu.

Sima nhos podi odja kontradison e grandi. " Horas ki nu teni klaridadi i direson moda un raiu laser na kel ki nu ta dizeja kela ten ki kontisi, pamodi e lei di universu "

Pa rezumi : Ansia ku dizeju e ka mesmu kuza.
Ansia sta xeiu di elementus kontraditorius sima kes 4 lista anterior. Horas ki nu ta konverti un ansia na un dizeju bu ta fika klaru i lojiku sima un raiu di laser i dizejus ta kumpri.
Si nu ka konverti ansia na un dizeju, keli sempri ta fika na futuru.

BY : TRIYANA

POEMA : SONHU I SURPREZA

Si apenas restan un sonhu
Nta ben krel sima tamanhu di mar

Si felisidadi kai na nha brasu
Nta tatual na briza o na un roza

Si speransa pouza na nha mon
Nta guardal pertu di delikadeza

Si bu fazen un surpreza
Nta fika sen palavras apenas ku emoson

Si ternura viaja na nhas odjus
Nta lebal ate infinitu i el ta ser un mitu

Si bu kanta kel muzika "HELLO"
Nta ben krel na melodia profundu di mell

Si amor ben intxin di bejus
Nta multiplika i akarisia bu kabelu transadu

Si dipos di tudu inda mpodi skrebi
Nta inventa un poema pa komemora nos equador

BY : TRIYANA

PENSAMENTU : MUZIKA DI NOS VIDA

"Kel storia li ta kumesa sima kes otus...Ku un muzika.

Afinal na kumesu tinha palavras i es ta binha kumpanhadu di un melodia. Foi assin ki mundu foi feitu, ki vaziu foi divididu na terra, strelas, sonhus, Deuzis i ki animal ben pa mundu. Es foi kantadu.". Keli e un parti di livru " Anansi Boys " di skritor Neil Gaiman,( un testu kin le na algun parti na Barcelona ) ki ta difini ezatamenti u kin ta xinti en relason a importansia di muzika na mundu.

Pami kumesu ou rekumesu ta ben sempri akompanhadu di novus muzikas. Kata importa stilu. Muzikas ta anda di mon dadu ku nos lembransa desdi ki nu nasi. Bu ta obi kel melodia i....PUMMM, bu ta odja dinovu na anus 90, na kel noiti friu ki STONES ta kantaba " You're the only one witth mixed emotions "...Na nha kazu ta obi HELLO di LIONEL RICHIE ( Nos muzika )...Sin poi ta pensa fundu, katen ninguen ki kata asosia un muzika ku un momentu spesial na vida, seja la qual for.

Nta kustuma fla ki nha vida amoroza ten sempri un trilha sonoru orijinal pamodi nkata konsigui dividi repiti mesmu muzika ku dos momentu diferenti. Muzika pami ten ki ser monogamiku. Si el marka un epoka el katen ki marka un otu. Nka sabi si ku nhos ta pasa igual, mas ku mi e si i nta atxa un sofrimentu sen limiti...Pamodi, nu rapara, muzika katen ki opta pa amoris ki nu ta dizignas. Bon muzika ta embala amoris mau i visi-versa. Por issu, gosi mi e kauteloza ku nhas trilhas sunorus i ku ken kin ta skodji pa entra na nha vida, afinal paga playlist e tan o mas frustanti quantu skesi un amor.

PENSAMENTO : MAS KI SODADI

Nka kria pa keli kontiseba nunka, nen ki for pa 2 dia ki fari 2 mes ( un iternidadi ). Mas nkative skolha anonser aseita, talvez e nha spiritu ki sta konversa ku mi, nha alma ki kre bai vizita algun amiga o apenas nha aura ki sta muda di kor. Di qualquer forma poku ta importa u ki e, nsabi man sta xinti algu stranhu. Nka sabi difinil, nkata ben dal nomi di sodadi pamodi e mutu mas ki kela. Nsta mal pa sabi ma duranti 2 mes nkata podi odja bus lindus odjus o bus transas na nhas dedus i ami na bu petu ta durmi. Dja nsata ku falta di pega na bu mon i xinti nhas veias ta salta ki ta dan levi aflison mas ki ta pasa logu dipos, pamodi e prazer na pegau. Mesmu mon ki ta fazen karinhu, nsta xinti falta di kel abrasu pertadu i gostozu, di kes ki alguen ta fitxa odju i xinti kuzas sabi sen sabi splika, apenas xinti.

Dentu poku tempu nkata sabi kuze ke odja tv, nen sai ta korri na meiu di txuba pa ka modja, kanta mi so na toma banhu, nen xinti qualquer kuza pamodi seguramenti nkata ben lembra di mas nada.

Si dja pasa 2 semana inda nsta rasteja na txon so di xinti bu falta, di fala disparatis, di storias abusurtus, kultura jeral, vida, amor, filmis,  ou apenas sta obi rabulisu di silensiu.

Dipos di tudu ki bu le apenas nten un rekadu : Nsta xinti bu falta, el ka e un AMOR CLICHE, e un konkluzon kin txiga dipos di tantu sentimentu afloradu. Nkata konsiguiba splika  nen kin tinha  tudu forsa di mundu pa skrebi un karta ku 200 folhas. Kata kebi na papel, mas ta kebi li, dentu di mi, na tudu kantu ate ki ta due. E apenas AMOR, nada mas ki kela.

Sempri li ta sperau...

BY : TRIYANA 

FILOZOFA

Hoji nkorda ta akredita ma tudu sta ben ser diferenti. Nsubstitui kel " era uma vez " pa " vai ser dessa vez " i nhos sabi pamodi? Pamodi nta akredita ma ku fe, speransa, amor, karinhu i txeu trabadju ma tudu e pusivel.

Kata importa luta kin sta vivi kata importa difikuldadi, amor i fe dan koraji di rekumesa, alias, el ta dan tudu noti i kada manha es xansi i ami nsta agara es posiblidadi. 
Nta akredita, nkata duvida, nta vivi i nta prendi, nta idializa novus projetus i mesmu ki tempestadi tenta derotan, nta labanta kantu bes for nesesariu. Tudu keli pamodi nta akredita ma tudu kenha ki ten fe nasi pa vensi.

Beijus pa bo #siul #LMSI #DENIS Maria Fernandes Nilton Fer Castro ki ta dan kada dia mas forsa ku nhos amor... Triyana Fernandes NA MODU #FILOZOFA #GRESSIVES PAH

POEMA : FIDJU DI KURASON

Bu ka vivi na nha bariga
Mas bu entra na nha alma
Bu ka e plasmadu na nha sangui
Mas bu ta alimenta di nhas sonhus

Ku surizu mansu bu ganha nha kalor
Siumentu sima kel ki sai dentul mi
Mimentu sima kin ta dau nha petu
Bu ka nha fidju di sangui mas bu e di kurason

Sima horas kin obi gritu di dimeu nta xinti mesmu angustia ku dibo
Padas di bu pai i kurason interu dimeu
Bu ka nasi di mi, mas bu sta kompartidu ku mi
Nha kodezinhu, nha bebe, nha kurason tambe e dibo

NHA FIDJU JERADU NA KURASON

POEMA : SILENSIU

Hoji silensiu pouza na nhas livrus
El txiga nha kaza, kalan boka i maran nhas dedus
Hoji silensiu persigui nhas palavras ki kria fuji
Ku aljema obrigadu i sensura previstu

Hoji silensiu lansa riba nhas palavras i el devoral sen piedadi
E infetal ku venenu i perseguil sen konpaxon
Hoji silensiu mbrasan sima morti ta agara sen volta traz
Nen siker nhas gritus di dizisperu ka obidu ki fari nhas lagrimas

Hoji silensiu tevi se vingansa
I ami di kurason na mo ta palpita di preokupason

BY : TRIYANA

PENSAMENTU : VALOR

Sera ki nu tada verdaderu valor a ken ki meresi?????

Es ta fla ma komputador tem resposta pa pergunta ki inda kata izisti, mas sera ki el sabi es nha duvida???

Sim pamodi e ka normal, ou nos sosiedadi sta tudu malukus ou nton nu ka sabi signifikadu di da valor.

Ok, agora poi kabesa ta funsiona i pensa ku mi, sin katen razon akredita man ta pidi perdon na un otu pensamentu.

Mas verdade e keli, nu kata da valor a ken ki meresi, anos e un bandu di mazokistas disfarsadu di intelektual ou nton nu sta tudu ku síndrome di STOKOLMU.

Flan pamodi ki nu kata ama ken ki ta amanu, respetadu, danu valor i konsiderason????Nu ta prefiri un alguen ki ta ponu na txon, satadjanu, pizanu pamodi nu ta xinti mas sabi, e ku kela ki nu sta kustumadu, pamodi kazu kontraiu nu ta stranha, nu kasta kustumadu, nu ta prefiri diskunfia, keli e mas siguru.

Anos e tan KOBARDIS ki nu ta prefiri fazi mal a ken ki krenu di verdade. Nu ta prefiri kruelmenti, di pior manera fazi xinti insignifikanti, un ZERO A ISKERDA ken ki ta preocupa ku nos.

Di tudu keli nta txiga a un tristi konkluzon, kel alguen ki nu kre di verdadi ta fazenu mal pamodi si kobardia el ta kaba pa fazenu mal, mas mesmu assim nu ta kontinua la ta insisti i ta sufri pa kel alguen pamodi nu ta fika impotenti i nu ta kaba a ka da valor a nos mesmu ( SIRKULU VISIOZU, 1 ta fazi mal a 2, 2 ta fazi mal a 3, i 3 ta sufri )

GRESSIVOS PAH

BY: TRIYANA

PENSAMENTO : VIBORAS

Ta dan grasa maneras ki na vida ten txeu viboras ku peli di santu "santxu".
Mpodi ate ben kritikadu, mas e u kin ta pensa.
Ten alguen ki na vida ses lemas e " fazi u kin ta flau mas NUNKA u kin ta fazi".Keli e un autentiku ipokrezia!!! Ta dizapontan so di pensa.

Modi ki abo un vibora, bu ta pasa vida ta kritika o ki alguen fazi o dexa di fazi i bu ka e kapaz di djobi un instanti pa bu biku i odja ma bu ta fazi kuzas pior.
Ka nu ta kritika u ki alguen ta fazi si nu sabi ma nu ta fazi pior. Bu ka e siker kapaz di agradesi u ki bu fazedu pamodi sinon bu era un ZERU a isquerda ( nada ).

Ka nu da pa santu sabendu ma nu ka e, simplismenti bu sta ngana e bu kabesa, pamodi alguen ki konxeu di verdadi sata txomau di VIBORA, RABENTOLA, MENTIROZA, MANIPULADORA, FALSA i mas palavras igual di "bunitu" .
Na verdadi ta dan mas e lastima ki otu kuza. Fazi bu merda???OK, mas dexa otus alguen en paz.

Ka bu bota pedra na tedja di alguen si bu sabi ma dibo e di vidru, ka bu ta fazi alguen kuza ki bu sabi mo kata gosta po fazedu izatamenti igual, si bu ten rabu padja ten kuidadu ku lumi ki bu ta kuspi pa bu boka, horas ku sta fala di alguen ten kuidadu pa bu kateni spedju bu frenti. 1001 frazis mpodia sitaba, mas ta sirbi di algun kuza? NAO!!! 
Simplismenti nu gosta di vivi na IPOKREZIA.

Nu gosta di da un imajen ki ka e dinos, algu imajinariu, se pa si, fika ta sunha kordadu assin bu ta ten kontrolu di tudu kuza. 
Poxa pah, ndebi sta mesmu indignada, mas sim...e verdadi, simplismenti ta kansam.

Mas keli kata dexa di ser simplismenti mas un di nhas pensamentus, si alguen kata konkorda nta ntendi, timodi nu ka ben mundu pa agrada tudu alguen.
Gosili sta lembran mas e titulu di un musika " LIVE YOUR LIFE " y deja de joder a los demas cojones.

By : triyana

NEWSSS!!!! Apartir di gosi bu podi paga IMPOSTO MUNICIPAL, IUP, IMPOSTO CIRCULACAO na COTACAMBIO ( Plateau frenti Calu & Angela ), Bon atendimentu i sen bixa txeu...

POEMA : HARPA

Primeru bes ki nu odja kumpanheru di verdade un HARPA toka. Ka foi sinu, sima skritoris romantikus ta kustuma fla. Foi HARPA!!!!!

Un strela kadenti korta seu i era di madrugada. Na 10 sigundu nfla pa mi mesmu “ keli e kel homi ki sta ben mastiga nha alma. Nsta fudidu i ami nsta amal “.

Kel minina tinha 29 anu i el ta gritaba dentu di mi, ta korri dentu di artérias ku un redi di kasa borboletas. Kes borboletas tinha perna i tambe es ta koreba i ami nta xintiba ma li dentu era un quadru de Abraão Vicente ou un Poema di Kaka Barboza  pamodi gosi tinha bo.

Minina, borboletas, nha sangui…tudu ta koreba pa el enquantu nstaba paradu. Era rozas ki ta naseba na nha mo i ntinha ki sukundil nha tras pan ka mostra kes spinhus.

Tudu keli era na 1 sigundu na kel dia ki nu konxi di verdadi.

Son di kes alguen ki sta jugaba pertu fika baxinhu i ami apenas nta obiba kel HARPA. Nha kurason kata bateba disparadu sima nta speraba. Nau! Simplismenti el para. El fika bem paradinhu enquantu minina i borboleta ta buskaba bo dizisperadamenti.

Dipos bu aproxima, bu beijan na boka i nu bai juga. Nunka nkontau ma na kes primeru 10 sigundu ki nu konxi di verdadi  ami djan era mas dibo du ki jamas nfoi dimeu.
I nta amau desdi kel dia pa frenti

MI + BO = NOS ( SEMPRI )

BY : TRIYANA

POEMA : AQUI JAZZ

Nkre para di skrevi
Kel auto terapia kasta funsiona
Nhas xamadas di atenson kasta rezulta
Pulisiau????NUNKA

Nton kuze nta fazi ku nha inspirason????
Nta fogal na nhas lagrimas
Nteral djuntu ku nha alma

Trajiku???? 
Talvez nau, poku ta importa letras palavras historias pensamentus i poemas...
Uniku kin sabi man sta enfria, nstaba verdi radianti, na alguns horas amarelu sol, na un dia interu KODIGU LARANJA....

Ken kre odja final des katastrofi????
Ami nka kre sta pertu, nsabi man e un mufina/kobardi mas akredita man ka kre sta pertu pan odja fin, pamodi si bu perguntan, nta respondeu, bu dan aula, ami e bon aluna...

Uniku ki ta resta e un AQUI JAZZ

PENSAMENTO : PAMODI KI BU TA FAZI ALGUEN KUZA KI BU KATA GOSTABA POH FAZEDU?????

Trata alguen sima bu ta gosta po tratadu, ka bu fazi kuza ki bu kata gostaba po fazedu, ten txeu manera di spresa es ideia, keli e un prinsipiu baziku di vida, mesmu na vida pesual, sosial, laboral, si bu trata sima bu ta gosta po tratadu, ku igual atenson i respeitu...Mundu ta serba un lugar midjor pa vivi.

BIBLIA ta fla " Ama prosimu sima nos mesmu ", PLATON ta flaba " ke pan dadu fazi pa otus alguen u ki ami nta kria pes fazeba pami ", CONFUCIO ta fla " ka bu fazi a otu alguen u ki bu kata gostaba po fazedu ", CRISTIANISMO fla " tudu kuza ki bu ta kria pa homis fazeba pa nhos, assin tambe nhos fazi pa es ", MAHATMA GANDHI flaba " Nka gosta di palavra toleransia, mas nta atxa un otu midjor. Amor ta obrigau a ten pa otu alguen mesmu respeitu ki bu ten pabo " JOAO PAULO II flaba " Respeitu pa vida e fundamentu di qualquer otu direitu, inkluidu liberdadi ", i mpodia kontinua ta fla mutu mas frazis di grandi homis.

Seja pa falta di auto stima, pa diskonhesimentu, egoismu o arogansia , kantu bes dja nu pasa pa riba di direitu di otu alguen, i nu ta odja nos emoson frustradu horas ki alguen ta mexi na dinos, i tan rapidu nu ta skesi ma nos tudu ten mesmu valor.

Si bu kre pa alguen suri pa bo apenas bu ten ki suri pa el, si bu kre respeitu apenas bu ten ki respeita, fazi un insaiu, kumesa dja ta atendi xamada/mensagen pamodi bu podi fazedu igual, ka bu fala mal di alguen pamodi es ta fala dibo tambe, ka bu julga pamodi bu ka perfeitu.

Trata alguen ta implika un atitudi i un emoson pa ku otu alguen. Bu debi di tenta poi na lugar di kel otu alguen ( kalsa se sapatu , anda mesmu kaminhu ), xinti u ki el ta xinti. Si nu fazi keli koretamenti akredita ma kurason, intelektu i ason ta bai djuntu, es ta dexa poku spasu pa HIPOKREZIA 

...Nu pensa un poku...

PENSAMENTU : KAL KE IDADI SER FELIZ???

Ninguen ka konxi el mesmu ate el tem mas di 30 anu. Tem alguen ki ka konxi el mesmu ta ronda 70 anu, mas keli e otu storia. Antis di 30 anu nu e apenas un sonhu, un dizeju ku txeu direson i un speransa na ndjarga. Ate 30 anu inda nu sta difini u ki nu kre, u ki nu gosta, u ki nu kre ser, katen limiti di planu, numeru di namoradus/as nen pa quantidade di erus.

Dipos di 30, nu ta kontinua ta da topada, nu ta kontinua sem sabi, nu ta kontinua ta spera, mas pelu menus nu tem un ideia ti undi ki nu kre txiga. Ka e fasil, kela nsabi. Ta izisti un preson na mundu pa bu ser algun kuza : ALGUEN GRANDI, ali ki ta kumesa guerra, bu TEM ki tem un diploma, un profison, un namoradu/a, un kazamentu, fidju, katxor. Bu tem ki korta kabelu, tra pircing, saia mas kumpridu, bikini mas grandi…

Undi kita para???Nta konta jaja…Un dia, na momento ki menis bu ta spera bu ta kontra ku un xatu i bu tada konta ma bu konfundi responsabilidade ku falta di spontaniedadi, bu kriansa interior ta sta fula da vida kubo, pamodi e un kastigu ki bo mesmu kria. NSTA ERADU???? Podi ser, mas bu tem ki tem txeu equilibriu pa bu sabi hora di ka leba kuzas asseriu dimas. Mas kriansa grandi kin e. Kel paranoia di 20 anu ( finalmente ) dja termina. Gosi bu tem ki ser bublimi i sem spinhu na rostu, i fla o ki nhos kre, mas nunca mas bu kata morri di amor ( invenson dimeu?) Nahhh, nta atxa ma nau. Dipos di 30 anu nu ta sufri di amor ku dignidade, nu sabi ma tudu dor ta passa ku tempu, nu ta ntendi ma tiradu morti i lei di gravidadi, tudu tem soluson.

Sin ta gostaba di volta na tempu? Talvez pa muda 2 kuza, mas parsen man kata fazeba, ninguen kata xinti falta di ser insegura, ninguen ka gosta di pidi mama ku papa autorizason pa sai, ninguen katen sodadi di kel aflison di ser VIRGEN i pensa na “ primeru bes” ou nton “ SO KELI?” NAU nhas amigus, tem kuzas na vida ki ta midjora inkrivelmenti ku idade. Nkasta skrebi es testu pamodi na pokus dias nta fazi 30 anu mas sin pamodi nsta odja txeu alguen ku medu di fika mas bedju, mase bom renova ken ki nu e pa dentu. Dja sta bom di txora na kantu pamodi bu ta atxa ma dja bu passa idade di kumesa tudu dinovi, dja sta bom di dramas pamodi inda bu ka atxa amor di bu vida ( kuza ki ami djan atxa #siul# ), kel alguen  ki bu podi vivi bus dias. Amor katen idadi, beleza tambe nau. Pa kada un, vida ta da se momentu. Ka e pamodi sosiedadi ta danu un prazu ki nu ta siguil na linha.

Txan konta nhos un kuza, dipos di txeu aniversariu ( izatamenti 29 ), ndiskubri man ganha mutu mas di kin perdi, ku tempu nganha koraji, seguransa, sperteza, intelijensia, seletiva i mas feliz. Mperdi vergonha, nhas insegurança ( ka tudu, mas pelu menus maioria ), tambe mperdi medu di fla o kin ta pensa. Kuze kin ta pensa??? Ahhh, mudjeris tem stadu tolas dimas, nu para di pensa na idade, kabelu branku ou ariga, nu skesi equason ki nu inxinadu pa nu tem un vida perfeitu, nu para di fla “ djan passa idade”, nu konxi nos mesmu mas i midjor, prenxi nos vaziu, paraliza nos medu, skesi di tudu sinal ki kata fazenu feliz. Plastika e internu, si sta mal kompol, kumesa tudu dinovu, aproveita pamodi bu sabi o ki ta fazeu bem. MUDA PA DENTU, afinal ku ki rostu bu kre txiga na 40 anu???

PENSAMENTU : NHA HOMI QUAZI PERFEITU

Nha Homi perfeiti e ka mas lindu di mundu mas nta odjal komu tal
El ten txeu misteriu mas el kata dexan na vaziu
Si beleza ta transgridi horas ki el ta suri i mas horas el sta seriu

Nha Homi perfeitu e bon, el ten jeitu karinhozu
Horas kel ta fala meigu ta rapia korpu
Nha Homi perfeitu e finu i fiel, mas dosi ki mel

Nha Homi perfeitu ta tran di duvidas horas kin pensa mal
El ten paxenxa dimas ku nhas atakis di inseguransa
Si el maguan el ta aseita si eru i tenta ramedia

Nhos podi sta pensa ma es homi perfeitu kata izisti
Ou nton ma el e GAY, mas akredita nhas amigas...
Nha homi perfeitu ta izisti i el e quazi perfeitu. ( Defeitus? el ten txeu, mas nta guardas pami )

#SIUL#

PENSAMENTO : MUDJER INDEPENDENTI

Nha storia ta kumesa assin...
Nten amigas lindas, intelijentis, devertidas, independenti sen namoradu.
Nhos sabi pamodi kes sta sen namoradu?
Pamodi es e Lindas, intelijentis, divertidas i indipendenti.

Homis inda ten medu di mudjer ki ten se autonomia.
OK ok ok, nu bai ku kalma.
Keli e un asuntu pulemiku i ami komu un skritora amadora, mudjer, indipendenti i fiminina, nkre mostra nha pontu di vista sobri kel asuntu li.

Primeru kuza, nka gosta i nka kre poi tudu homi na mesmu saku. Ta izisti Homis i Homis, ou midjor, Homis i mininus.
Kada un ten un kriason, un modelu a sigui...Nton kazu li ka e diskuti ken ke midjor ou pior, mas sin mostra ma aukontrariu di kel ki ta fladu, ta izisti na mundu homis ku kabesa abertu sufisienti pa aguentu un mudjer ku autonomia na se ladu. Ago abo ki ta mata 1 tigri por dia bu ta perguntan....na undi?!!!
Bom, nten ki ser solidaria i flau, fasil el ka e nha amiga. Nu ta vivi na un sosiendadi kamufladu na maxismu, ten ideia propriu inda ta da medu a txeu Homi.

Djan namora ku Homi ki el ta flaba mel e super modernu, ki na fundu, ditras ki kel gravata ou uniformi el tinha ideia di amor mesmu ultrapasadu. Di pertu quazi ninguen ka e u ki el ta parsi, mas asuntu e ka keli, pa speriensia kin ten i kin ta ntendi, na maioria di namoru i kazamentu di hoji, mudjer indipendenti pa varius razon ten un posiblidadi mas txeu di ten un relason midjor....
Bu kre sabi pamodi?
Ben fasil, pamodi nu ka mesti, nu ka mesti mesmu, apenas nu kre un alguen ki nu podi kompartilha, durmi mbrasadu, beijus, ideia i sonhus. 

Ami nka nasi ku don pan dipendi di homi, i mutu menus fika di boka kaladu, por issu kin sta skrevi es testu, pa kaba di un bes ku kel mitu di MUDJER MUDERNA ta termina el so.
Mudjer indepententi ta termina feliz na bon kompanhia.

PENSAMENTO : NTON BEN

Odja li, keli e fala aserio : katada mas! toma un atitudi i ben faxi, buska manera
Panha bu muxila, poi dentu del kes kuzas ki mas bu ta uza, kebra karton di banku, pidi un buleia i ben

Ben, mas ben faxi, ben odjan
Ben kontan munti tonterias
Ben beijan ben divagar

Ben juga ku pinta di nha korpu
Ben!
Ben rabida nha kaza palbesa, ben rabidan kabesa pa baxu, fazen odja kes bus vidius interesanti, nu dexa kel filmi na repeat pa nu ka obidu

Ben!
Skesi trabadju, internet, jogus na movel  
Dexa kel mania di kre i atxa mo ka podi pamodi bu kateni nen un tuston

( Nu ta volta sempri pa mesmu refron? )

Nton ben...
Skesi rima, skesi proza, bu ta beijan i ami nkre mesmu e skrevi " una puta historia "
Nu ta ten kes konversa ki kata termina, sen kumesu sen fin, undi ki nu ta kumesa fala di melodia i termina ta fala di futbol ( Porto x Benfica )

MOS ABO E DODU
Mas ami e dodu na bo
Nton simplismenti ben, djan sta ta sperau
Bu LADY TRY

POEMA : SIGREDU

Nsta bem konta un sigredu
Nta  flau el bem baxinhu
Pegadu na bu ovidu
Pa nen deuzis ka obi

Xiiiuuuuu
Ka bu responden
Apenas obin ketinhu
Pamodi nta flau el 1001 bes

Bo e un kalada di noti baxu lua xeia
Sin diskrevi tamanhu di alegria ki bu ta dan
Akredita me ka sufisienti
Pamodi bo e kel ki sta dan paz

Bu ta fala ku mi nta direti
Horas ki bu tokan nha korpu ta rogau
Ami nta gritau na ovidu
I bu ta kontan bu SIGREDU

P.S : Di mi pa bo

PENSAMENTO: HOMIS BANANA x HOMIS DI VERDADI( dja sta na hora di nhos honra nhos kalsa!)

Pikenas problema e keli, Homi ke Homi tem ki tem KORAJI, Koraji pa ser Homi, Koraji pa assumi ses defeitos, Koraji pa mostra ses frajilidadi, Koraji ate pa termina un namoru.

Ah, nhos poupan! E kovardia dimas pa nha kabesa, Bu ta djobi i la es sta : Empresarius, ta dizafia siensia i teknolojia, Juiz, Politiku, Modelu…Mas e so relason fria , duvida ta parsi i…undes? Es ta bira KOBARDI, es ta retrai, es ta perdi, es ta sukundi medu na frieza i indiferença ( kal ke sexu frajil mesmu?).

Rapaz, nhos obin dretu ( nes kazu, nhos le dretu ), nu ta prifiri mil bes pa nhos flanu sem voltas txeu “ma nhos sta kansadu, ma nhos ka krenu mas”, di ki kai na CLICHÉ mas uzadu na mundu : kel di homi distante ( katen kuza mas angustianti ), e kel tal di ka da notisia , dismarka enkontru, inventa diskulpas, fla mel kateni dinheru (nu sta na sekulu 21, ami tmb mpodi paga, dahhh), insisti ma kel velha “amiga” e apenas “amiga”. Horas kin ta odja un situason di kela nta pensa logu “ el sta sobestima nha inteligensia neh?”

Gosi ndiskubri ma no, apenas es ta sta ta sukundi MEDU absurdu ki es tem di nos. Medu di nos reason, medu di nu txora.Ami e di kes ki ta aseita pasivamenti un KORTI, mas si un individu kumesa ta fazi horas pan da konta di se intenson di fuga….Ali gohhhh…nta bira bitxu

Ngosta di palavras na rostu, di frazis ki ta due (terapia di xoqui), di verdadis bem fladu, ami e pratika na sertus situason: ou bu kre ou bu ka kre. Nta atxa un stress fika ta pensa ma MOS sta distante pa nos kulpa, ou pamodi trabadju, família ou seja o ki for.

Ka bu pidin pa le sinal (pamodi nka strada), skreven un bilhete na post-it, e mutu midjor ki fika na vaziu

Anos mudjer romantikas i sonhadoras, tambe nu sabi ser objetiva, nu ka gosta di perdi tempu, nen nu ka kre kema nos neurónio ta tenta adevinha o ki na verdadi nhos kre.

Frankamenti CHICOS, foi nhos ki nasi ku CULHOES, ka e pusivel pa nhos fazel un BANANA

Nsabi, nsabi, mi e konsienti ma talves nsta pega pizadu dimas, mas e ki nhos Homis, nhos tem difikuldadi na lida ku emoson, ku nos instabilidade imosional. Mas mesmu assim nhos ta kontinua ta ser fofus ( horas ki nhos kre ) insubstituível ( horas ki nu kre )

Nton pa amor kin tem pa nhos, nta pidi nhos (mininus) NHOS SER HOMI DI VERDADI pamodi nu e apenas mudjer i nu ta mesti di nhos

PENSAMENTO : NHA ARTI E MELODIA!

 Mben pa pergunta, pan intendi mi mesmu, pan ser feliz.Por isu kin ta skrevi. Palavras e nha terapia, nha remedi, nha pontu di fuga i enkontru. Na arte nta buska mi mesmu, e la ki sempre nta sta.

Nta buska verbu, nta rebusca na letras, consola na frazis ki txiga fin.

Quen ki konxen?

Bu ta atxan na Poemas/Historias ou na nha Blog http://triyanafer.blogspot.com/ , ta mostra ma solidon ka debi ser kruzadu bo so. Talves ami mpodi, i kela e quazi sertu, muda pa kel ton di kel musika i fika la “nhas letras”(G-Amado)…Ah, nhos diskulpan, Beto dias, ATA Djudja, Charbel, Djodje, To semedo, nta spera ma nhos ta intenden, i mas artistas kin ta inklui puetas,muzikus i mas sunhadoris ki ta parsi konxi fundu di alma.

Horas kes ta fala des es ta mostra un poku di nos. Ken ki nunca pensa pelu menus 1 segundu “ kel muzika li foi fetu pa mi?” , ami djan apropria di txeu muzikas ( ku devidu kreditu di autoris , klaru ), kin ta flaba ma era “dimeu”.Na kel momentu, kes i so es ta parseba intendi o kin sta xintiba.Letra pa letra, rima pa rima, na kada nota un spantu i un sensason di profundu ntendimentu ku mundu : sin, nkasta miso.

Arti foi fetu pa uni, pa protesta, pa provoka, pa seduzi. Por issu nta passa vida ta skrevi, ta buska kel versu sertu, strofe perfeitu, ou konxi mi mesmu midjor. Sin sata konsigui? Nka sabi flau, Arti nen sempri e bondoza. Un dia el ta ponu na ragaz i otu ta fazenu odja o ki inda e difisil di nxerga. Mas katen problema.

Enquantu tem un puema pa konsolanu i un bom muzika pa komovenu “nu ta kai nu ta rabida”.

PENSAMENTO : BATALHA INTERNU: FIKA KONTRA BO, PAKE?

 Ah, nka sabi nau. Ka e di nha distinu ser moderada ( 8 ou 80 ). Kasta na mi, nkata ntendi. Nta obi musika relaxante, nten txeu fazis “ ZEN “, nta buska midita, nta anda sem sapato, nta inventa letras pa spanta mau odju. Mas nhos kre sabi un kuza? Tudu kel kin ta importa TA IMPORTAN TXEU. Sugan, leban, atrain, fundi na tudu kel kin e i ki ta konsumin. Sorti dimeu di doua dimas i ku tal intensidadi i inda sai bibu die s vida.

Nle na algun lugar ma Homi tem ki ser DIRIGIDOS i mudjer tem ki ser KONTROLADAS. Dja nhos kustuma obi ta faladu di kela? Mas e verdade, tem txeu realidade sukundidu na kel frazi. KONTROLU SOBRI NOS MESMU kin kre fla, Pamodi Direson por mas ki nu nega i afirma ma nu sta perdedu nu tem.

Mudjer nasi ku sextu sentidu i mas sabiu ki razon. Duvida? Ndebi dimiti ma algun bes nta duvida…di mi.

Ami e amiga di lua ( luna ), nta odja nha kabesa horas i horas na mundu ta buska un splikason pa tudu.

Un kontradison? Podi ser, mas un kuza mprendi na un spantu…Nu tem un poder dentu di nos ki katen tamanhu i pa mi un karangueju i izajerada, keli e un dizafiu ki ta fazen fika kara kara ku ken ki podi, as ves ta fika nha pior inimiga: ami mesmu, nunca es flan ma maios guerra ta kumesa li, dentu di nos mesmu. ( ou djes flan i ami nka ntendi dretu : frazis so ta fazi sentidu horas ki nu sta preparadu pa obis ).

Por isu ki hoje ku tudu nha ignorância i nha vontade di prendi ki kata kaba, nta pega na nhas fraquezas, nta dexas na fila i nta studas sima ki nha vida ta dipendi di kela, ku auto kontrolu na mon, un propozitu dibaxu di brasu i nhas inimigus iternus ta durmi, nu podi.

Quen sabi, nu podi fika un guereru impecável ou se no apenas RI, o kip a mi dja bali kel guerra.

.

PENSAMENTO : PRINSIPI DI SNOOKER

Un kuza e sertu : Bom di vida e ki quazi tudu ta muda, i muda mesmu, di un dia pa kel otu.

Sima ki alguen la diriba obi kel iternu “nkasta aguenta mas” i el dau kel prezenti: toma la…i kel prezenti tem un nomi (ki na nha kazu nfazel italianu).

El tinha un kabelu inkomun pa se idadi mas ki ta fikaba el inkrivelmenti xarmozu, un surizu ki “putakipari”. Ki surizu e kela?Ah tah, bu sabi mel ta matan.

Nka pensaba man ta kaiba mas un bes na storia di sorizu…mas nkai, ago nhos flan modi ki un mudjer di quazi 30 anu ta fika boba ku apenas un surizu?

Pan safa nkumesa ku storia di : el kata fazi nha tipu, ma kela e frutu di imaginason, mel katen nada ver ku mi…ami nta adora inventa amoris, nton txan bem prova ma e apenas un iluzon.

Mfika konfianti, mas la staba el ta pasan un mo na sentura, un beiju na piskosu, kes conversas ta bai ta bem i kel surizu, ali nta fika paralizadu sima ki dja passa sekulus ou uns segundus.POXA, otraves la nsta : el ta flan OI, el ta flan un OI i ami nta kre morri, mas ninguen kata morri so pamodi el fladu un OI.

Fodas, nhos diskulpan nha spreson, mas FODAS, ku tudu letra propi. Nsta fudidu pamodi un homi i se situason prekariu.

Ku kel primeru beju nfika sima un minininha di 13 anu ku kel uniformi ridikulu na kel hora ki kel rapaz mas bunitu  di skola ta bem dau un beju. Dja passa mas di 15 anu i bu ta da konta ma dja bu kria, muda, prendi, tropesa, fera, mas te hoji inda ta akredita na prinsipi mesmu ki di SNOOKER

PENSAMENTO : FILISIDADI PA 0.99$00

Kuze ki bu kre pa bu vida? Emoson baratu? Oferta irezistivel? 

Nka sabi si un dia mundu ta kansa des disponibilidadi dimas. Felisidadi pa 0.99$00, pega ou larga.

Mundu sta invertidu ou e mi? Nu ten ki vira di kabesa pabaxu pa nu fika tudu igual.
Kel ki era segredu gosi sta skankaradu, kel ke klaru nu ta guardal a seti xavi.

Ami nka kre nhas vontadis tortus i nhas segredus fika sukundidu. ami nkre mas e ke pes sai pala, nen ke so pes ka enferuja.
Ami nta sigui kel ki pami e mas valiozu : nha kurason, si bu sta na kaminhu nta lebau ku mi (bu kre ben?).

Djan kansa di paga mas pa menus.
Nta odja bu alma, nta odja bu inserteza, mas nka kre bus duvidas...Por favor durmi kos nen ke pa un noti.
Ami tmb nten medu di sta eradu, leba bu kulpa podi ser un bagajen dimas pami si bu ka djudan.

Bu ta ntenden? algun dia el ten ki da sertu, si ka for di un manera ki nu sunha ta ser di un otu mutu midjor
Bu sabi ma mundu ta juganu na kanela? Ami nka kre kompiti ku refron, ami nkre poizia, sentimentus i bejus na piskosu sima bu ta dan. Keli e pidi dimas?

POEMA : ANJU NEGRU

Un praga txiga terra ku peli di anju
Es ta transforma nos kruel vida na un morti
Skravizanu ate na interu di nos alma

Ku se luz dislumbranti es ta seganu
Fazi di nos pobri kurason pior ki un zombi
Stermina kel poku speransa

E un mal negru
E un paz sinzentu
E un lutu sukuru

Nha insignifikanti ser distrosadu
Mentiras, promesas di un anju
Anju di aza negro

Ser kruel
Ser malefiku
Un anju NEGRU

BY : TRIYANA

POEMA : MI KU BO = NOS

MI...
Tentadora moda un masan
Atraenti moda luz
Dosi moda mel

Delikada moda nuvens
Oferesida moda un promesa
Akolhedora moda hogar
Mimoza moda un gata

Profunda moda mar
Misterioza moda noti
Romantika moda poesia

BO...
Kenti moda veron
Sensivel moda peli
Brinkalhon moda un mininu
Ku speriensia moda pasadu

Stimulanti moda vinhu
Atrevidu moda abismu
Ternu moda un mai
Apaixonadu moda un vulkon

Kompasenti moda terra
Amanti moda un sombra
Eternu moda un paraizu

MI KU BO e un matimatika
Perfeitamenti kalkuladu
Ki rezultadu e NOS

BY: TRYANA

POEMA : AMOR

Nu era dos solitariu
Nu ta vagaba na mundu 
Sen rumu nen direson

Signifikadu di felisidadi
Traduson di amor
Nu tinha ki baba na un romansi pa intui

Dos alma vagabundu
Sorti botadu pa azar
Distinu ki nen Deus ka sabia

Entri 8 i 80 nu kontra
Entri noti i jogu
Txiga kel dia ki ultimu bola entra

Ka era tabela
Nen sorti di un azaradu
Apenas 2 alma ki kontra

Di mansinhu mas pertu nu fika
Sen sabi pamodi
Kel palavra kumesa ta ten sigifikadu i traduson
....AMOR....

BY : TRIYANA