PENSAMENTUS: TI UNDI KI NU TA PARA????

Nka sabi nau,mas tempu di reloji kasta sirbi mas pa es mundu. Kada dia ki manxi bu ta korda ku un novu invenson teknolojiku e inventadu. Nu ta djobi paladu i bluetooths, wirelles,infra-vermelhos i koneson via satelite ta invadi nos vida i ta konetanu ku planeta terra na un instanti.

Palavras ta navega pa terra, agua i ar, i el ta parsi na tempu rial pa diminui distansia i solidon. Bu ta liga PC.....i.....bu sorizu e odjadu na otu ladu di webcam ki ta respondeu via Skype : Bon dia! Assin nu ta kontinua, nu ta manda emails, nu ta fala tonterias na facebook, nu ta le Blogs, nu ta uza Google pa tudu kel ki nu ka sabi, nu ta namora i trabadja pa msn, nu ta manda fotus pa telemovel a un amigu ki sta lonji, nu ta fla  ‘nta amau` na velosidadi di luz ( e ka kel tempu la de tekla `send`)

E verdadi, tudu kel ki ta parseba staba lonji , fika mas pertu. Ami ngosta de sta ku pe na txon mas ku txeu teknologia, bu kre ntenden? Nen ka bu tenta pamodi nen mi ka sabi splika. Ta izisti futilidadi teknolojiku ben gostozu i ken ki fla ma no, nunka el xinti kel prazer di anda na rua ku ipod sima ki el sta fazi parti di un vidio clip imaginario ou nunka viaja na meiu di nada ku un PC sabendu ma ten kel 3G di Tmais  (mesmu ki lentu) i manda bu trabadja justu na tempu, enquantu bu ta mata meti pe na areia.

Mas....TRIM! Novu mensagen di voz, nta le i nta perdi. Kuze ki fazen skrebi  es testu xeiu di bytes i palavras ki ta auto-koriji?  Hum....kurason ta aviza: e vaziu, mesmu ku es rapidu koneson ki ta liga ku mundu, nunka nxinti alguen diskonetadu des manera, ka so di es mesmu mas sin ku otus tambe.  Ta parsi ma karensia ta avansa na mesmu velosidadi ki teknolojia ta progridi.

Txeu bes nu ta prefiri fika na un relason ta jura ma nu konxi dretu (mas ki ta vivi na otu hemisferiu) sen pelu menus ri ku kel vizinhu interesanti ki da kontron ku bo.  Ami nka kontra relason a distansia, mutu menus virtual (nha kazu Barcelona – Lisboa), kada ken sabi di se vida i nunka ninguen kata ntendi amor (grasas a deus).

Ami nka Antropologa, Sosiologa, Psikologa, nen senhora ki sabi tudu, apenas nta xinti, i o kin ta xinti e o ki mundu sta karenti. Karenti di realidadi, frazis kopiadus i fotus korijidu pa photoshops, na modi, ken ki nu kre ngana? Midjor uza teknolojia a nos favor i toma apenas kuidadu pa nu ka uzal moda un forma di sukundi nos medu i defeitus.

Afinal nu ser sinserus pah,txeru e txeru, beju e gostozu, peli e quimika i ami nkata sabi sin kreu pamodi bu imagen de 480 pixels dexan di boka abertu. Ah nau mesmu! Ami nkre provau literalmenti. Palavra pa palavra, beiju pa beiju, frazi pa frazi. ( Sorti dinos ki teknologia inda ka konsigui pluga nos kurason).

PENSAMENTU : AUTO TERAPIA

Ponteru sta konta, hora sta skori na dedu, terra sta jira mas faxi, folhas di kalindariu sta vira rapidu dimas.
Horas ki nu da konta na meiu di konfuzon/tumultu, nu ta sta ku ansiedadi ( ku un lista grandi di kuzas sen fazi ) Rezultadu? Ansiedadi, aflison na petu ki kata dexanu para.

Nu kre ser mas rapidu, produtivu, mas felis, mas joven, mas konektadu, NU KRE SER MAS SEMPRI.

Na verdadi katen nada di mal na tenta ser perfeitu, mutu menus kre ser midjor. Vontadi ta bira problema horas ki nu bira vitima di nos presa e ansiedadi ta bira un problema na nos vida.
Nsta nganadu? Parsen ma nau. Tudu bira FAST.
Tudu kel ke novu ta bira obsoletu na kiston di mes, storia atraves di storia, upgrades tudu dia, é txeu novidadi ki mimoria kata konsigui lembra nen di nos numeru di telemovel pah.

Nu ta pasa vida ta korri, ta kalkula, ta soma.
Ta tenta skesi ki na fundu vida é un grandi CLICHE e kuzas ki rialmenti ta fazi diferensa é simplis

Nka kre leba des vida un lembransa ki ta inklui rostu feiu (kela pami é fomi), nka kre falta aniversarius, inkontru ku amigus, skesi un abrasu,nkre leba di lembransa tudu kuza simplis kin ta konsidera grandi:Amores, Ri, Bejus, Abrasus, Alegria, Realizason, Palavras, Poemas / Historias, Tigre.Pa disfruta di vida kata izisti presa

Na ta skrebi pelu menus djan poupa 10 anu di terapia, mesmu kin diskorda ku alguns otus kuzas ki dja skrebeba/skrebi ou sta pa skrebi.
sim, pamodi si antis nsta skrebeba man ka gosta di kalma, pamodi ki gosi nsta skrebi pa kuzas ten ki bai lepete lepete? Sera kin ka sabi kuze kin kre?
Na verdadi nunka nu sabi kuze ki nu kre, por issu nu ta tenta leba vida sima nu podi, hoji ta kori moda tigre, manhan ta gatinha moda tartaruga.
Ki mas ta importa é pa nu vive kada instanti di vida ku tudu intensidadi ki nu podi.

PENSAMENTU : NKA GOSTA DI KALMA

Nka sabi gosta ku kalma. Aliás, nka sabi kuze ke kalma. Kela na verdadi ta izisti?
Bu kre kalma, Pidi un kopu di agu, un xá di kamumila, un ramedi.

Ami é totalmenti kontrariu.
Nkata konsigui spera pa fixon sta prontu, ami nten ki panhal na ferbura. Inda mas spera pa kuzas kontisi. Ami nau.

Ami é di kel ki ta fazi. Nta toka dianti, nta pega na brasu, nta puxa, nta mordi. Nta kansa mas nta fazi

kansa tambe.
Kela ka ker dizer kin ta orgulha del. Puffff, ta da trabadju pah.

As ves nta fika uma kansadu di apenas ser TRIYANA . Pamodi ser TRIYANA  é un trabadju kansadu, sen folga e mal pagadu.

Nka sabi gosta ku kalma. Ka bu pidin kalma kretxeu.
Gosi ki dja bu sabi modi ki nha banda ta toka, toka un nota o da piska bu ngosta.

PENSAMENTUS : PESIMISTA O REALISTA?

Nu supoi ma Romeu ku Julieta ka morri, nu imagina ma ses familia aseita i es ganha mas un membru na familia enves di perdi un fidju. Kuze ki ta kontiseba dipos, nha amigu Shakespeare?

...Romeu ta trai julieta ku un puts qualquer, el ta pegadu i dipos fika ta rasta na txon ta buska pel perduadu. Problema é ki Julieta ka é Amelia, mas sin un mudjer di verdadi.
Ku apenas ( da piska bu ngosta ) pa Ro

meu, el ta diskola uma pretu tozu tozu, el ta bai di ferias, el ta bai vivi amor sen dramas.

Ka mesti manda e-mail, mutu menus rekadus na facebook, Romeu babaka.
Julieta bai konxi sabi, sen wi-fi ou 3G. Ultimu mensajen ki Julieta manda foi pa se prima Kali : "Rikardon ten un primu ki sta li, para di perdi tempu ku rapas moda bu namoradu"

Good girl gone bad girl.

PENSAMENTUS : SEN PALAVRAS

Nkasta konsigui spresa, nta fika ta odja pa papel branku ku ar di boba,mas...NADA. Nen un frazi ku sentidu/lojika, NADA. Dipos di tantu tenta, nta insisti pa nada.

Skrebi ta adianta kel sodadi skizitu, ki kata bai se kaminhu, Sodadi ta fika ta martela na nha kabesa, ta dan un angustia na petu, nta ri ta imagina ma si bu staba li bu ta flan me midjor mbai na mediku.

Mas bu kasta li, i papel branku

Bu ta dizafian, nta skrebi tres o quatru letra pan pasa tempu i dipos nta tekla na BACKSPACE rapidu nta dizaparesi ku tudu. Sima ki sensason kin teni ta pagaba sima un majia. Mas, nau. Pa sodadi katen BACKSPACE. Kata izizti DELETE, kata izisti kel tekla pa trazi kel prezensa.

Apenas ezisti abo, na otu ladu di osianu, ta fazi senas (mil senas)...Ta dexan li, muda, literalmenti sen palavras, sen spasu, sen testu.

PENSAMENTUS : TEORIA I PRATIKA

• Nka é un esperta na Amor, mas djan leba (i da) txeu patada na bunda nes vida, Patada na bunda é un di kes kuzas mas komun ki ten. Ken ki nunka lebal?
  
  Homi o Mudjer i independenti di idadi, lembra ki nada kata kontisi atoa, i tudu ten se tempu sertu pa kontisi, é klaru ki horas ki nu sta maguadu ku alguen kata adianta pa amigus dau konsedju o tenta djuda, nada kata funsiona.
  Kela ta dipendi so di nos mesmu labanta kabesa i supera, sima un kantor Caio Fernando Abreu ta fla "Tô me afastando de tudo que me atrasa, me engana, me segura e me retém. Tô me aproximando de tudo que me faz completo, me faz feliz e que me quer bem” keli é un bon konsedju pa sigui.
  
  Akredita mas na bo i bu potensial, trasa objetivus i trabadja kada aria dividi di manera spesial. Da valor a bu trabadju i dedika a ken ta amau di verdadi ( Dénis Xavier ), da valor a bu familia i onra bus kompromisus.
  Enfin, fazi ki vida bali pena, i ka bu vivi ku pensamentu na un mundu di fantazia ki kata ser realidadi.
  Abri odju pa otus alguen, pamodi bu podi ser alvu di un kurason apaixonadu sen sabi i di alguen ki menus bu ta imagina.
  
  ( Teoria é bunitu di skrebi, mas pol na pratika ki sta komplikadu, hehehehehe)

PENSAMENTUS : ENTRI MI I PALAVRAS

Pami, poku kuza é midjor di ki skrebi. Ideias ta aterrissa direpenti i mundu sima ke pa majia ta para. Tempu ta nkodji i tudu ta fika suspensu. Ku apenas poi mó na tekladu (ou caneta na papel) ki relojiu ta da un KLIK. Imagen ta diskonjela, pagina en branku ta toma vida i storia ta kumesa divagar.

Katen otu manera. Palavras ta dominan, ta dizenha kapitulus, ta mostran ken kin é ( i ken ki na verd ade nkria ser). Horas kin ta skrebi tudu ta bira rialidadi, é nha mundu imajinariu, lugar ki dives en quandu nta atxa algun trasu dimeu.

Na palavras nta kontra ku Triyana, é na momentu kin ta xinti mas livri, mas kompleta, kin ta diskubri nhas diferentis fazis i frazis..

Na verbus, nta atxa nhas partis di duvidas,lokuras i retisensias… I mesmu ki ta asustan,nsta la : skrita, prontu pan le nha kabesa, torna le i edita.

É verdade, skrebi pa mi é nha maior/midjor ezersisiu, pa prendi, humildadi i aseita. É nha midjor/maior terapia gratuitu, i nha midjor psikologa é filosofia di literatura.

Por issu ki horas ki letras parsi…Bom, nta dexa pes leban. Undi kin ta bai? Nka sabi, mas kata importa, di mó pegadu ku palavras, nta spera man ta konsigui di algun forma atxa resposta pa nhas eternus pergunta ou talves diskubri mas un kuzinha di mi.
(Palavras i Triyana nta diklara nhos, Maridu ku Mudjer)

By : Triyana

Pa mi pokus kuzas é midjor ki skrebi.

Ideias ta aterisa direpenti i mundu sima ke por inkantu ta parsi pára.

Tempu ta nkodji. Tudu ta fika suspensu. I é só poi dedu na tekladu 

(kaneta na palel), ki relojiu direpenti ta da un KLIK.

Imagen ta diskonjela. Paginas ki staba branku ta toma vida, storia ta

kumesa sutilmenti ta dizenrola. (Mesmu ki só dentu di mi).

**********SOMETHING NEW IS COMING***********