POEMA : DISTINO

Kada piskador tem si pexi

Kada jardinero tem si flor

Kada kantor tem si musika

Kada alguem tem si metadi

Sima ki es pintxa distinu na kosta

Di mansinho bo txiga na mi

Nhas markas ta fazem pazigua

Mas vontadi bó sta trapadjam

Na seu tem kel strela mas brilhante

Tem kel noti ki lua é mas bonito

Igual ki baxu spinhera tem kel sombra 

Ami é sortiada pa teneu...é nha distino


Sima poeta tem si poesia
Sima sol tem si lua
Sima lumi tem si agu
Sima ami nteneu...nha distino

POEMA : KODE SPERAM

Enquanto nta pensa na bo, ntabata skrebi
Bos brinkedos novu kim kumprau
Nta lembra di nha kodé i nha kuraçom ta txora


Nha kodé speram
Padas di mi
Dentu poku nta volta
Nha kodé speram


Sta falta poku pa no volta sta djunto
Nteni bo soriso dizenhado na menti
Ta djudam ser mas forti
Sima mprometeu man ta ser


Pensa na mi sempre
Mesmo kim kasta bo frenti
Pamodi nha vida é sta ko bô
Pamodi nha paixom é amau


Kada sigundo ki falta kuraçom mas pertado
Maior tortura é sta longi bô
Durmi nha kodé ki horas ki bo korda
...Mama ta sta na bo lado

POEMA : VAMPIRA

Nossa senhora da graça
Dizimola djudam
Tentaçom kre kai na mi
Nkateni força pa luta


Vampira ko peli di anju kre sugam
Si odju tem lumi mas se boka tem mel
Ami é humanu e pekador
Nha korpu kata aguenta es tentaçom


Djel dominan ko se olhar
Ami é um marioneta na se mô
Subi riba di mi mordi i toma nha alma
Ki bo korpu dja bira nha inferno


Nem krus ko prata kata spantau
Adju ko agua benta é bo tempero na nha korpu
Igreja dja bira bo kasa
....I ami djam sta perdido

POEMA : PROVOKAM

Dexa agu korri na bo kosta
Sima kaxuera ta dixi na ladera
Nta bai mata nha sedi 
La na undi ki kosta ta perdi se nomi


Txuba ta kai bo perto el ta ivapora
Papel ta kai na bo lado el ta pega lumi
Planta ta kai na bo bera el ta seka
Ami sim kai na bô  nta direti


Quanto mas perto bo nsta, nha folgu é mas forti
Kada toki di bo dedu kuraçom ta palpita mas
Bo sta juga ko vantagem ja ki djam perdi norti
Korpu ta tremi e suor frio pamodi bo txero


Bo olhar sta mostram kuzas
...Kuzas ki ta fazem imagina
Bo boka sta fazem xinti kuzas
...Kuzas kim kre pa bo fazem

PENSAMENTOS : DISKULPA DI DISTANSIA

Ndevia kumeça es textu ta fala o quanto no sta distanti, ou n'devia kumeça ta fala sobre promesas ki ka kumpri?


Kanto bes dja no briga pamodi nta flau ma apenas bo ta falaba i bo katinha atitudi?
Ka bo respondi,sigui kaladu.
Hoji kem ki sta bem fala é mi, Kuzas kim tinha guardadu dja tem tempo.


Distansia ka simé? Sempri foi bo diskulpa disfarapadu,kuza ki sempre nduvida
Bo skesi ma tambe nsta longi di bo, bo skesi quando bo flam ma nunka bo kata dexam?


Yah, bo debi di skesi. Pamodi gosi nsta li mi so na es barko,bo salta i dexam sem remo,sem bo, sem nada pam volta i nkosta.


Obili. Bo sta dexam mesmo foga? Bo sabi man ka sabi nada. Bo ta larga nha mô mesmo?
I kuzas ki bo flam? promessas,planos, nunka izist...i verdadi?


Na boa, nka sabi pamodi ki inda nta insisti na pensa na bo.
Nka sabi pamodi inda ntem sperança i borboletas na stomago.
Nka sabi pamodi ki inda nta durmi ko telefoni na lado pa bo da konta ki amor mas grandi katem

POEMA : ORGULHO,KOBARDI OU MEDO

Nunka m´ama na nha vida sima m´amau
Por isso nkata konsigui skeseu
Guarda na lembrança man ta amau
Mas skesi tudo o kim tinha fladu



Palavras é fasil di sukundi sodadi ki fika
Mas djam kansa di dispista
Kem ki djobi na nhas odjus ta sabi verdadi
Nkria buskau pam flau ma inda nta amau



Tem kuzas ki tempo kata disfazi
Tem kuzas ki vida ta pidi mas
Se inda nsta tenta afasta
Nha kuraçom ta pidi volta


Dia kim mata nha estupido orgulho
Momento kim pára di ser kobardi
Istanti kim dexa nha medu di ladu
Nta promenti man nta leu verdadis nha poema na bo obidu

POEMA : ENTRI MI KU BÓ

Distansia entri mi ko bó fika um abismo sem fim

Forti nxinti sodadi bo voz

Mbuskau, mprovokau na nhas poemas

Si sta difisil gosili i um minuto é iternidadi

Mesmo kim djobeu mas perto

Nkata konsigui odjau pamodi staba tudo insertu

Podi ser algum kuza kim fazi ou fala

Mesmo kim atxa um soluçom

Bu ta troka di sonhu pa mexi ko nha vida

Nha amor konxi tudo bos gestos

Palavras ki bo olhar ta fla só pa mi

Si pa bó es guerra djam perdi,nta muda di sonhu pam fika na bo vida

Si sta difisil fika na bo vida

Sabi ma apenas mbuska um saida pa nha dor

Nta fika sempre ko sperança ma Lua ko sol ta volta kontra

By : Triyana

POEMA : AMOR PURO

Djuntu ko bó nkatem medu di morti nem di inimigos

Lambuxam na aroma di bu peli

Na bu ausensia nta leba na mi bo esensia

Bu é nha iluzom,nha diliriu,pa bó nta perdi kabeça

Enkantada nsta ku bó

Bu feitisam

Bu mbruxam

Bu nvenenam

Lebam sempri ku bó

Na bu alma,na bu menti

Aroma di nos amor

Sempri nta tem kalor di um lumi sendedu

Lumi ki nem ventu ki fari algua ta paga

Sempri nta fika viva

Tem algum rosa mas bonitu komparadu ko nos amor?

Ninhum...es amor forti i verdaderu

Tao forti ki nem morti kata sipara

POEMA : KARNI I OSSU

Nha odju perdi vida

Nha kuraçom perdi alma

Apenas karni i ossu

Moda um makina ligado na bataria

...
Um korpu vaganti
Sem era nem bera

Vazia sem sentimento
Katem dor nem amor

Si ta izisti seu el é pa otu alguem
Si ta izisti inferno el é nha vida

Talves um mazokista ou um martir
Mas ami é apenas um karni i ossu sem alma

Spulsada di reino di amor sem piedadi
Injuriada maltrata kim bira koru bedju

Mperdi nha pureza nha sperança
Pam protegi di mundo nfazi tratu ko luzifer

Nunka mas xinti amor nem dor
Nha trato era perdi nha alma,ser apenas karni i ossu

By: Triyana

POEMA : SEX ON FIRE

Baby modi ki sta bem ser hoji
Nkre pa bo bem tokam kada milimitro di nha peli
Fazem diskonsentra,perdi txom baxu nha pé
Skesi di vizinhos i mundo


Hoji nkre gritau pamodi nteni briu
Nha korpu sta pidi bo lumi
Es noti nem bombero katem nada fazi ko mi
Ofisialmenti mi é um insendio sem kontrol


Dexam lambuxa na bo korpu
Som di bateria ta sigui nos movimento
Bo é sex on fire i ninguem ka podi tadja
Apenas kontinua numpriti na nha ladu

POEMA : STUPIDES DI UM ORGULHO

Devi ser bem difisil ser abo mesmo gosili
Ouve um tempo kim pensa ma bo ta voltaba atraz
Mas é triste odja manera ki orgulho ta domina um homi
Honestamenti ta dam pena bo komportamento


Nkata gostaba di sta gosili na bo peli
Talvez ndevi sta perdi nha menti
Mas nsabi ma bo ta gostaba di muda tudo kuza gosili
Alvés é bom volta pa traz i muda nos azneras


Gosi nsabi manera ki um diziluzom ta amarga vida
Bo mostra bo lado mas feio i bos palavras foi pior ki um tiro
Ka foi um mal entendido mas sim bo stupides
I hoji nos tres sta sufre bo orgulho

PENSAMENTOS : LIMITI ENTRI INTUIÇOM I PARANOIA

Ános mudjeris, no é assi: Dodu na sinal, nkasta fala di sinal di transito nem simbolos matemátikos.
Na verdadi no é spesialistas na PENSA ki no sabi DISIFRA  universo maskulino.
Diskubri kuze ki tem ditras di o ki homis ta fla. Di kada frasi, kada email, kada xamada ou rekadu na facebook.
Pa nós, o ki homis ta fla kata pasa di "palavras ditas"
No ta buska kel fika na ar, o ki ta mora na strelas, afinal no é mudjer, verdadi?
No kaba pa ganha kel kondiçom di INTUITIVAS.


Nta lamenta fla nhos,mas tem momentos ki no ta sta nganado.
É ka nos intuiçom ki sta fala mas sim INSEGURANÇA, é traumas di otus relaçom, karensia, siumis i otus partikularidadis di nos parte negro ou ki kasta bastanto klaru i ki no ta insisti na sukundi.
Bo kré um exemplo? Bo namoradu ta txomau sexta fera di noti ko um voz ki kasta animadu, kata importa si el trabadja dimas,si el sta preokupadu, si el viaja di madrugada, no ta pensa logu: EL STA TRAMA AGUM KUZA


Di la no ta kumeça buska sinal ki alvés nem kata izisti. Podi até ser ki no sta serto,homi "putero" ta izisti desdi ki mundo é mundo.
Mas nha pergunta é : UNDI KI STA LIMITI ENTRI NOS INTUIÇOM I PARANOIA? Pensa dreto.
Si for intuiçom, um ponto pa nós (nu é bom nel na verdadi ). Mas i si foi apenas imaginaçom (loukuras di nos menti fertil), ta bem txiga um momento no ta pasa di fofas i "tia buena"  a um xata "de los cojones".


É verdadi pikenas, katem nada mas irritanti ki siumis sofokanti . Um pokinho inda é sabi, é saudaver até xarmoso.
Mas horas ki um alguem fika um maniako obsessivo, kretxeu, katem amor ki ta aguenta.
Nta pensa ki no ka podi kunfia na ninguem si no kata kunfia na nós mesmo, sim pol na pratika? Bom, nsta tenta.
Mesmo karanguejo karenti kim é , nta lembra tudo dia antis di imagina kuzas ki Nunka no kata podi tem kontrol sobri vida di um otu.
Nunka no kata podi impidi nós namoradu,noivo ou marido fazi o ki das na tóla, mesmo ki no fika ta kontrolas (horas ki es sta pa fazel, nada kata impidis)


Txam konfeça um kuza : Pode ser ki EL STA TRAMA ALGUM KUZA sim.
Mas si el sta trama dja ka é problema nem dimeu nem di bó, BO TA KONKORDA?
Djam fla um bes ki nos "escolha" ta difinino, pa bem o pa mal.


Bo kre sabi quando ki no ta entendi menti di um homi? Dia ki no poi na kabeça ma nunka no kata txiga entendes, igual ki es a nós, Ou seja, NUNKA
Apenas um konsedjo, Ka bo stresa ki vida é dos dia pa bo sta ta perdi um dia ko PARANOIAS o INTUIÇOM

PENSAMENTOS : HUMILDADI SEMPRI

Si bo é kapas di manti kalma horas ki tudo alguem dja perdel mesmo ki es  kulpau

Si bo ta akredita na bó, mesmo ki tudo es ta duvida

Si bo é kapas di spera sem dizispera,ou ka ngana,ka menti a mentirosos

Ser odiado i sempri skiva di ses odio,ka parsi bom dimas nem pretensioso

Si bo é kapas di pensa sem da tiro na bo pé

Ó sunha sem fazi bos sonhus dominau

Si bo atxa triunfos ó disgraças  i bo konsigui tratas di mesmo forma a kes dos impostor

Si bo é kapas di sufri dor di odja muda armadilhas di verdadis ki bo fla sem pensa

Si bo é kapas di perdi tudo i nunka fla nada,resigna i volta a ponto di partida

Força kuraçom,nervo,muskulo,da tudo o ki inda na el ta izisti

Insisti mesmo kansadu , derotadu i kontinua ta persisti

Si bo é kapas sta entri povu i ka korrompi entre poder,ka perdi lealdadi

Si bo é kapas di defendi di amigos bom ó mau pamodi tudo es tem se utilidadi

Si bo é kapas di da sigundo a sigundo minutos ki tudo tem si valor i brilho

Terra é di bó ko tudo ki ta izisti na mundo i mas importanti, bo ta ser um HOMI di verdadi

POEMA : PAIXOM SEM KONTROL

Na bu mó djam larga nhas fantasias

Lugar kim ta entrega nha korpu entri lançol

Tempo ta pára nes perdiçom ki katem segundo pa pensa

Ropa ta dizaparesi i bo ta fika vulneravel nha frenti

Toma nha peli ko bo boka kim kre vensi  tempu

Um guerra entri amor ki apenas ta izisti um vida i dimeu sta perdi na bo korpu

Torna susuram bem baxinho "mi é dod na bo"

Na um instante nta volta ser dibo

É um kalor ki ta sai di mi ki só bo podi sopral

Podi ser um fantasia,iluzom,sonho ó ki mundo sta kaba

...Mas kel noti na kel hotel di jogus...Bus sestus nkata skesi

Fika na nha seleçom kim kre juga ko bó mas um bes

PENSAMENTOS : HORAS KI BO BAI AMI DJAM VOLTA

Um pergunta ki sempri no ta fazi...
"Pamodi ki el kata amam?"
Talves pamodi no foi tao estupidas di pos kuzas fasil dimas
Alvés ta parsi ma homis gosta di mudjer ki ta das guerra,sempri ki no for totalmenti submisa no ta kaba pa panha mau


WATAFUCK!!!!


1º kuza ki no debi di fazi é ser difisil,dexas tokanu dianti,si es ka bem simplismenti é pamodi es ka krenu (homi sta txeu na mundo)
2º Ama bo kabeça antis di tudo i nunka dipendi des
Ko apenas kes 2 dikas é sima ki es ta xinti dizafiadu i es ta fika moda um katxorinhu traz di osso,hehehehehe (que mala soy)


Imagina horas ki EL flanu mel ta txomanu mas logu ou ki el ta bai atxanu i el kata parse
No ta fika uns fulas na kasa,ki si no podi no ta nhemel
...Mas i si em ves di no speral no sai ko amigas i strapola,ES ki ta fika uns fulos


O kim ta fla sempre,relaçom é moda um guerra,kem ke mas fraku ki ta perdi,ou seja,sempri kem ki sta mas apaixonadu ki ta da mal.
Pa kel regra li é midjor no tenta ser mas forte (menos apaixonadu ki kel otu alguem), é la ki nunka ninguem kata fazeu mal


Rezumindu,é keli kim ta txoma apaixona ko kabeça i nunka ko kuraçom,antis di bo dam um tiro djam pou venenu na kumida

ROSTU BEBE KO MIMO

                             KUZE MPODI FLA NHOS?NHA BEBE É LINDO ATÉ TA TXORA

                                            NHA BEBE KRE MIMINHOS DI MAMA NEH?

POEMA : ES NOTI NSUNHA

Es noti nsunha

Nsunha ko um guitarra ta txora

Kantu kim korda n´odja ma era nha alma

Só gosi kim persebi

Es noti nsunha

Nsunha ko um djatu di dizisperu

Kantu kim korda nha garganta sta dueba

Só gosi kim ntendi

Es noti nsunha

Nsunha ko um mar di sangui

Kantu kim korda nha kuraçom staba dispadaçadu

Só gosi kim komprendi

Es noti nsunha

Nsunha ku um viuva

Kantu kim korda nstaba na koba di nha kretxeu

Nka persebi,nka ntendi,nka komprendi i nkata aseita

Bo dexam li mi só

2x1 Kanye West, Jay-Z - Otis and Bad Meets Evil - Lighters ft. Bruno Mars

POEMA : BU KANETA AZUL

Nta skrebi ko es kaneta pa kura dor di nha sufrimentu

Nta skrebi pa afasta angustia di ka teneu nha pertu

Nta skrebi pamodi ntemi akredita na bo amor

Di pior manera mprifiri afasta di bo karinho

Podi txomal medu,kobardia ó insegurança

Pániku entra na mi di mas um bes frakaça

Di longi nta sufri di pior manera

Ta lembra kel kafe na kama i um nota na ladu

Kel kaneta azul ta fazem skrebi nha sodadi

Nha insegurança fazem bai nha portu seguro

Disidida na mata nha kuraçom i alma pa fika só ku razom

Uniko manera di ka volta sufre

Staçom di komboio ta fika testemunha di kel amor

Lua la diriba ta txora sodadi sol

I mi ko nha kaneta ta skrebeu es poema pa bo ka odiam

UM PASAGERA BEBADA FAZI STRIPTEASE DENTU DI AVIOM KI FOI FORSADU UM ATERRISAGEM

Por kausa di striptease di um pasagera russa ki staba bebada tripulaçom di voo Moscú-Londres foi obrigadu a volta a terra poku dipos di dispega

Muder di 39 ano kumesa ta duspi enquanto ki el sta fazeba um badjo sugerente (sensual) frenti di pasageros,el tra okulos di homis ki sta viajaba na aviom (talves pel odjal midjor,lol)

Kel spetakulo erotiku obriga tripulaçao di Airbus a regresa pa Aeroporto Moscovita di Domodedovo.Aviom tivi ki sobrevoa duranti 1 hora na Aeroporto até dadu autorisaçom pa fazi aterrisagem

Senhora foi "amolestada pa bandidagem" i aviom volta despega sem kel "bailarina"

Oba oba oba,sta parse ma gosi voo sta bem ser bem mas animadu,na TACV sta bem fazedo tambe?

Mulherada,quem se anima?

Mas enquanto ka parado di bendedu bebida alkoliku dentu di aviom e proibi alguem subi moku na aviom kela ta kontinua ta pasa

NHOS KATA IMAGINA DINHERO KI TA GASTADU NA KEL BRINKADERA LI.

TUDO MINISTROS DI ZIMBABUE STA SINKUNSIDADU

Kanto kim odja kel notisial li mpensa ma era txokota,mas ta parse me verdadi


Tudo Homis di gabineti di ministro na ZIMBABUE sta bem ser sirkunsidadu "para dar exemplo" pa tenta reduzi infeçom  pa virus di SIDA,na um pais em ki 1 di kada 7 alguem sta infetadu.
Kanto ki visi primero ministra anunsia kel norma li ministros pensa ma era un brinkadera


Segundo uns studos medikos,sirkunsizom podi reduzi numero di kontagios di VIH até um 60%,por isso autoridadis di Zimbabue teni objetivo di sirkunsida 1,2 milhom di homis antis di 2015


Talves kastaria mal tudo Ministros di Cv fazi o mesmo hehehehehehehehe

Outro 2x1 - Beyonce 1+1 and Leona Lewis/avicii-collide

TEM MUSIKA KI KA MESTI KOMENTA APENAS XINTIL

How To Love By Lil Wayne and Megan Nicole (2x1)

POEMA : TORMENTU DI NHA ALMA

NSTA SKREBI ES MORNA
DISTINU DI UM MARTIR
SEMPRI KI BO OBI TXORU DI UM GUITARRA


ÓH NHA GUENTI,NHOS OBI NHA DIZISPERU
TRISTEZA KI DJA DOMINAM
É KULPA KIM STA PAGA


NTA SAI NA RUA TA DJATA,MAS NINGUEM KATA OBIM
SUBI RIBA RAGAS DI NHA NITA PA NINAM
MAS É DOR KI STA KABA KO MI


AMI NA PONTA PRETA TA BUSKA NHA DISTINU
LAGRIMAS DI SEU TA MATA NHA SEDI
BENTU TA GUIAM PA NHA KASA


NOSSA SENHORA DA LUZ LUMINAM NHA KAMINHO
DEUS DJA SKESI DES PEKADORA
GOSI NSTA LI TA PAGA PEKADUS DI MUNDU


XINTI ES RABEKA KI STA BEM DI MI
KADA MELODIA TA SAI DI NHA DOR
NHAS DJANTUS DENTU DES REFROM


XINTADU NA ROTXA TA SPERA NHA PISKADOR
DAM KEL BEJU PA NINA NHA ALMA
ALIVIAM NHA SER KO BO AMOR

POEMA : DOR DI KRETXEU

NKRIA UM NOVELA I BO ERA KEL ATOR
KEL STORIA MAS BONITO KI BO PODI IMAGINA
SIMA UM MUSIKA KO MELODIA PA KALMA KURAÇOM


MAS TUDO ERA UM SONHU KI BIRA PIZADELU
KEL BARKO KIM POI NA MAR ERA DI PAPEL
EL KABA PA FUNDIA DJUNTO KO MI


NSTA FOGA NA NHAS LAGRIMAS KI NEM ANJU KA PODI DJUDAM
ES DOR NEM UM MONTANHA KA PODI KOL
NTENTA DI TUDO MANERA MAS BO KA DAM XANSI


INVERNO TENI NHA DOR,OTONU NHAS PENAS
NA VEROM ALGUM TXORU SKESEDU NA MAR I NHA ITERNO ALEGRIA FIKA KO PRIMAVERA


KEL KARTA TA FIKA NA LEMBRANÇA MA DESDI SEMPRI NTINHA BO KU MI
POLU OPOSTU TA KABA PA ATRAI?NAO SEI,AGORA TENHO AS MINHAS DUVIDAS
RASIONAL KO IMPULSIVA,ALGU KI KA PODIA,I UM DIA TUDO TA PASA

POEMA : AMOR KI DÁ MEDO

PREOKUPAÇOM ENTRA NA MI KANTO BO TXOMAM DI KRETXEU
STRANHOS SENTIMENTOS DESDI KEL NOTI KI NO ENTREGA SEM TOKA
KA FOI UM FUZOM DI KORPU MAS SIM DI ALMA


MPERDI NHA SER NA BÓ KIM PERDI KONTROL DI SITIAÇOM
KUSTUMADU KO ESTRATEGIAS,REGRAS I ARMADURAS PA NINGUEM KA MAGUAM I DIVAGAR BO DIZARMAM


PÁNIKU TXIGA NA MI KI PREFIRI PÁRA PA LI
NKA KOBARDI,APENAS UM REALISTA
KADA VEZ KIM XINTI MAS PERTU DI BÓ MAS LONGI NTA STABA


SABENDO MA KADA DIA NTA KREU MAS I É TORTURA KA PODI TOKAU
DISKULPAM SIM STA BEM FAZEU MAL,MAS NKRE PROTEGEU


ÓH PANTXOLA DIMEU,KA BO ODIAM
ANTIS DIM BEIJAU DJAM PERDEU
SÓ NTA PIDI DEUS KI DIA KIM ODJAU KA SER TARDI DIMAS
KI KEL LUMI INDA STA LA GUARDADU TA SPERAM

POEMA : PRIMERO AMOR

Primeru amor no kata skesi

É moda sikatris ki ta dura vida interu

Él ta fika sempri na nos menti

Mpergunta nha kuraçom si um dia nta skeseba nha primeru amor

Ta ri el respondi:

Ka bo sunha ko impossivel kretxeu

Amores ntive

Amores nta tem

Mas abó nunka nkata skesi

Nunka ka bo fla Adeus

É palavra muto triste

Dos alguem ki ta ama kata dispidi

Pasa tempo

Pasa anus

Mas di bo nunka nkesi

Um rosa ta seka

Um kastero ta romba

Rotxa ta bira areia

Tempo ta pasa i vida ta sigui

Mas sempri nta teneu koladu na mi

POEMA : DIZEJO

Primero nkata dizejaba Pamodi tudo era perfeito e nka mesteba mas nada Pamodi tudo ta rezultaba ko tempo

E nkumesa primero ta dizeja kasa ko bó Tem um kasa,3 fidjos,um gato,e ki tudo noti ultimo kim ta xintiba era bo mó na nha peto

Depos mpidi dios pa bo amam Pamodi nta xintiba ma bo era homi de nha vida e poku a poku nsta perdeba bo Um gesto um olhar é kuza simplis ki ta demostra txeu

Kanto kim odja ma era imposivel Mpidi pa bo krem nem ke um poko Pa bo mostram nem ke um kuzinha ma bo krem

Depos mpidi só pa bo xinti ganas de odjam E pa bo xinti korpo ta arepiau de alegria

Depos nroga pes trau de nha cabeça e de kurasom Mas raiz é forte e profundo e si el ka seka el kata sai

E gosi nsta kansado de txora E nsabi ma ninguem kasta devolvem nhas lagrimas Dja nkata pidi mas nada a Deus pamodi ta parse mam fazi algum kuza tao grave ki el kasta obim

Gosi nta pidi a.... na verdade nka sabia a kem kim sta pidi mas nsabi kuze kim kre
Ki um bala perdido dam um bejo e pa ninguem ka txoram

By: Triyana

PENSAMENTOS : Nos kuraçom sta preparadu pa obi sertus verdadis?????

Fala é fasil horas ki bo teni palavras na menti ki ta spresa nos opiniom

Difisil é spresa ko gestus i atitudis o ki realmenti no kre fla

Fasil é fasi kompanhia a alguem i flal o ki el kre obi

Difisil é ser amigo pa tudo hora i fra verdadi horas ki mesti

Fasil é konsedja um situasom ki kasta pasa ko bo

Difisil é vivel i sabi o ki bo debi fazi e tem koragi pa fazel

fasil é mostra raiva  i impotensia horas ki algum kuza sta nervau

Difisil é spresa bo amor a alguem ki rialmenti konxeu,ta respetau i ntendeu

Fasil é odja o ki no kre odja

Difisil é sabi ki no iluziona ko algu ki no pensa ma no odja i admiti ma dja no dexa di odjal

Fasil é fla "oi" ou "tudo dreto?"

Difisil é fla "adeus" inda mas horas ki no é kulpadu

Fasil é abraça,da mó ou beija ko odjo fitxadu 

Difisil é xinti energia kes ta trasmitiu,kel ki ta domina bo korpu moda eletrisidadi

Fasil é kre ser amadu

Difisil é ama di verdadi sem tem medu a vivi sem tem medu di manham

Fasil é fla reglas

Difisil é kumpril

Fasil é pergunta o ki no kre sabi

Difisil é sta preparadu pa obi resposta ou tenta entendi resposta

AMIZADI

DEUS KRIA AMIZADI  PAMODI EL SABIA MA HORAS KI AMOR MAXUKA EL TA KURA

MUSICA MARCIA UNICA

NKRE SER BO UNIKA

REVOLUSOM THUG SES REALIDADI

TRISTE DI ODJA

RAPAZ 100 JUIZ CV DI HOJI EM DIA

KEL MUSIKA LI TA REFLETI NOS REALIDADI NA CV

PENSAMENTOS : SPERA PA UM PRINSEPE OU KONSTRUI BO REINO?

ALGUM BES NHOS PARA TA PENSA:

I SI PRINSEPE AZUL KA PARSEBA PEL DA BRANKA DE NEVE KEL BEIJO PEL KORDAL?

POIS AMI MPENSAL, I KUZE KI TA PASABA?

SERÁ KI EL TA KONTINUABA ETERNAMENTI TA DURMI OU EL TA KORDABA,BUSKA UM BOM TRABADJO,TEM UM KASA BEM BONITO,BAI DI VIAGEM KO AMIGOS,TEM UM BOM KARRO I FAZI INSEMINAÇOM ARTEFISIL I SKESI DI HOMIS?

HEHEHEHEHEHEHEHEHEHE,KELI É UM DI KES KUZAS KI NUNKA NO KATA SABI,MAS I BO?KUZE BO TA FAZEBA?SPERA PA BO PRINSEPE OU KONSTRUI BO PROPRIO REINO?

Chico Buarque ...Boa musica

POEMA : BO (C)KOSTA

Bu kosta é nha diskansu...nha susegu

Nha kalma dipos di ama

Bo kosta é refugio undi kim ta txiga...

Na momento ki nha angustia ta maguam

Nkre poi nha petu na bo kosta

Dosi prazer na luxuria

Spumanti momentu di amor...

Ki ta dizinkadena na um paixom kompletu

Bo kosta é fabrika di nha poesia

Na nhas notis kim ta pasa kordadu

Bo kosta tem fim di kada dia

É kel beijo i sonhu kansadu

Vontadi kata kansam

Um horizonti absorvidu na fantazias

Dizejos di pouza nha peto na bo kosta

Nta perdi nha xintido mas nkata ignora bo falta

Si mó di distino é duro
Bo kosta é alto na lugar kim ta inklina
Txiga Deus ko nha pedidu,bo ombro é nha koragi
Pam tem kel ritmo di sta ko nha petu na bo kosta


By : Triyana